काठमाडौं- नेपाली कांग्रेस केन्द्रीय अनुशासन समितिले प्रतिनिधिसभा सदस्य निर्वाचन–२०८२ मा पार्टीका आधिकारिक उम्मेदवारविरुद्ध असहयोग गरेको आरोपमा ७ जना नेतासँग स्पष्टीकरण माग गर्ने निर्णय गरेको छ।

समितिका संयोजक तारामान गुरुङको संयोजकत्वमा ललितपुरस्थित बीपी स्मृति भवनमा बसेको बैठकले सम्बन्धित व्यक्तिहरूलाई ५ दिनभित्र केन्द्रीय अनुशासन समितिमा स्पष्टिकरण पेश गर्न पत्राचार गर्ने निर्णय गरेको हो।

स्पष्टीकरण माग गरिएका व्यक्तिहरूमा देवकरण प्रसाद कलवार (सन्तु), प्रदीप सुनुवार, प्रचण्ड विक्रम न्यौपाने, राजु खनाल, जंगीलाल राय, सकुन्ती देवी महरा र कौशल किशोर राय रहेका छन्।

अनुशासन समितिका अनुसार उनीहरूले पार्टीको आधिकारिक उम्मेदवारविरुद्ध असहयोग गरेको आरोप लागेपछि स्पष्टीकरण माग गर्ने निर्णय गरिएको हो।

समितिका कार्यवाहक मुख्य सचिव कृष्णप्रसाद दुलालले तोकिएको समयभित्र स्पष्टिकरण पेश गर्न सम्बन्धित व्यक्तिहरूलाई निर्देशन दिइएको जानकारी दिएका छन्।