तेहरान- इरानले देशको वर्तमान अवस्था अझै ‘युद्धजस्तै’ रहेको बताएको छ। प्रेस टिभीका अनुसार इरानी सेनाका प्रवक्ताले युद्ध पूर्ण रूपमा समाप्त नभएको स्पष्ट पारेका छन्।

इरानले अहिलेको अवस्थालाई सामान्य रूपमा नलिएको उल्लेख गर्दै उनले सेना र सुरक्षा निकायहरू निरन्तर निगरानी र उच्च सतर्क भएर सक्रिय रहेको बताएका छन्।

इरानले सम्भावित शत्रुपक्ष (अमेरिका र इजरायल) लाई चेतावनी दिँदै नयाँ कुनै कदम चालिए त्यसको जवाफ नयाँ हतियार, नयाँ रणनीति र नयाँ मोर्चाबाट दिने चेतावनी दिएको छ।

यसैबीच, इरानले अमेरिकाविरुद्ध संयुक्त राष्ट्र संघमा औपचारिक उजुरी दर्ता गरेको छ। तेहरान टाइम्सका अनुसार इरानले पठाएको पत्रमा अमेरिकामाथि आफ्ना जहाजहरू कब्जा गरेर ‘समुद्री डकैती’ गरेको गम्भीर आरोप लगाइएको छ।

त्यस्तै, इरानले केही दिनभित्र पाकिस्तानमार्फत् मध्यस्थकर्ताको सहयोगमा युद्ध अन्त्यका लागि नयाँ प्रस्ताव ल्याउने तयारी गरेको जनाएको छ। सीएनएनको रिपोर्टअनुसार राष्ट्रपति डोनाल्ड ट्रम्पले यसअघि प्रस्तुत प्रस्ताव अस्वीकार गरेपछि इरानले नयाँ पहल गर्न लागेको हो।