काठमाडौं– साहित्यकार तथा पत्रकार श्याम रिमालद्वारा लेखिएको जेन-जी आन्दोलनमा केन्द्रित कवितासङ्ग्रह लाभा सार्वजनिक भएको छ।

गत भदौमा नेपालमा विकसित भएको जेन-जी आन्दोलनलाई आधार बनाएर तयार पारिएको उक्त कृति विश्वभरका स्वप्नशील, साहसी र सिर्जनशील नवपुस्ताप्रति समर्पित रहेको जनाइएको छ। पुस्तकका प्रकाशकका रूपमा रचनाकारकी ९२ वर्षीया आमा चेतकुमारी रहेकी छन् ।

कृतिमा २३ वटा कविता तथा पुस्तकको आवरणमा एक गरी कुल २४ कविता समावेश गरिएको छ। यी सङ्ख्याले भदौ २३ र २४ गतेलाई संकेत गर्ने बताइएको छ, जुन दिन नेपालमा जेन-जी आन्दोलन भौतिक रूपमा सुरु भई उत्कर्षमा पुगेको थियो।

‘आगो’, ‘खरानी’, ‘डेलुलु’, ‘कैलदेवी’, ‘जेन-जी जुत्ता’, ‘मुस्कान खातुन’, ‘थुक्तेन’, ‘सेप्टेम्बर ८’, ‘भदौ २३’ लगायत शीर्षकका कवितामार्फत नवपुस्ताको आशा, आकाङ्क्षा, मुलुकमा देखिएको कुशासन, बेथिति, भ्रष्टाचार, राजनीतिक दल र तिनका नेतृत्वप्रतिको आलोचना तथा जेन-जी सहिदका भावनालाई अभिव्यक्त गरिएको छ। कृतिमा विश्वबोधसमेत झल्किने उल्लेख गरिएको छ।

निराश युवाहरूको आक्रोश ज्वालामुखीझैँ विस्फोट हुँदा देखिएको सामाजिक मनोदशालाई ‘लाभा’मार्फत प्रतिनिधित्व गरिएको र जेन्जी आन्दोलनसँग सम्बन्धित सम्भवतः पहिलो नेपाली कवितासङ्ग्रहका रूपमा यसलाई लिइएको छ।

गीत, मुक्तक, हाइकु, कथा तथा धारावाहिक उपन्यासमा समेत सक्रिय रिमालका यसअघि ‘एउटा काँढा बिझ्दा’ (गीतसङ्ग्रह), ‘त्रिशूलीको किनाराबाट’, ‘बारपाक’ कम्पकाव्य, ‘नदी बग्दैन’, ‘चमेरो’ र ‘हिमाल त कालै भएछ’ लगायत कृतिहरू प्रकाशित भइसकेका छन्। हाल उनी विभिन्न समयमा लेखिएका निबन्धहरूको सङ्ग्रह प्रकाशनको तयारीमा रहेको जनाइएको छ।