काठमाडौं – मोडल तथा सामाजिक सञ्जालकी चर्चित पात्र इभा गिरीले फिल्म ‘पाँच पाण्डव’मा अभिनय गर्ने भएकी छन् ।

यस फिल्मका निर्देशक वसन्त निरौलाका अनुसार आइतबारबाट इभा गिरी छायाङ्न सेटमा सहभागी भएकी हुन् । उनको भूमिकाबारे निर्माण पक्षले खुलाएको छैन ।

मल्टिस्टारर यस फिल्मको छायाङ्कन चैत २ देखि झापाबाट सुरु भएको हो ।

छायाङ्कनको १४ औं दिनबाट इभा पनि जोडिएकी हुन् । उनीसँगै कलाकार प्रशान्त तामाङको पनि प्रवेश भएको निर्देशक निरौलाले जानकारी दिए ।

‘पाँच पाण्डव’ को भूमिकामा हरिवंश आचार्य, जितु नेपाल, आर्यन सिग्देल, महेश त्रिपाठी र सागर लम्साल ९बले० रहेका छन् ।

यी पाँच पात्रहरूलाई केन्द्रमा राखेर बुनिएको कथामा महिला मुख्य पात्रका रूपमा दीपाश्री निरौला र जनी गुरुङ देखिनेछन् ।

काली रानी फिल्मस्को ब्यानर र सामाजिक कथामा बन्ने यस फिल्मको निर्माता नवीन श्रेष्ठ हुन् । कथा, पटकथा तथा संवाद सुशील पौडेलको हो ।