काठमाडौं- अख्तियार दुरुपयोग अनुसन्धान आयोगले बर्दियाको बारबर्दिया नगरपालिकाका इन्जिनियर मोहनदेव मल्ललाई नियन्त्रणमा लिएको छ । नगरपालिकास्थित भवन तथा बस्ती विकास शाखामा कार्यरत मल्ललाई १ लाख ५० हजार घुससहित नियन्त्रणमा लिइएको अख्तियारका प्रवक्ता सुरेश न्यौपानेले जानकारी दिएका छन् ।

मल्ललाई आयोगको कार्यालय बुटवल, सम्पर्क कार्यालय नेपालगञ्जबाट खटिएको टोलीले बिहीबार नियन्त्रणमा लिएको प्रवक्ता न्यौपानेले उल्लेख गरेका छन् ।

मल्लले नगरपालिका-७ मा रहेको जनता माध्यमिक विद्यालय रम्भापुरको भवन निर्माणको अन्तिम बिल भुक्तानीमा सहजीकरणका गरिदिएबापत सेवाग्राहीसँग घुस मागेको सूचना र उजुरीका आधारमा अख्तियारको टोली खटिएको न्यौपानेले जनाएका छन् ।

“… टोलीले निज इन्जिनियर मोहन देव मल्ललाई सेवाग्राहीबाट रु.१,५०,०००।– (एक लाख पचास हजार रुपैयाँ) घुस/रिसवत लिइसकेको अवस्थामा उक्त रकमसहित बारबर्दिया नगरपालिकाको भवन तथा बस्ती विकाश शाखाबाट मिति २०८२।१०।१५ गते नियन्त्रणमा लिई थप अनुसन्धान भइरहेको छ,” प्रवक्ता न्यौपानेले जारी गरेको विज्ञप्तिमा भनिएको छ ।