काठमाडौं । नेकपा एमालेका सचिव महेश बस्नेतले चाडपर्व सकिएलगत्तै पार्टी आन्दोलनमा जाने बताएका छन् । .

मंगलबार पार्टी केन्द्रीय कार्यालय च्यासलमा सञ्चारकर्मीसँग कुरा गर्दै बस्नेतले सरकार महँगी, भ्रष्टाचार र कुशासनमा लिप्त भएकाले आन्दोलनमा उत्रिने बताए ।

पार्टीको हालै सम्पन्न केन्द्रीय कमिटीको बैठकले जनविरोधी गतिविधिविरुद्ध प्रतिवादको निर्णय गरेकाले सोहीअनुसार पार्टी आन्दोलनमा उत्रिने उनले बताए । ” हामीले भ्रमहरू चिरेका छौँ र पार्टीलाई थप जुझारु बनाएका छौँ । सरकारका अधिनायकवादी हर्कतविरुद्ध अब एमाले टुलुटुलु हेरेर बस्दैन,” उनले भने ।

सरकार भ्रष्टाचार र कुशासनमा लिप्त भएको आरोप बस्नेनले लगाए । पार्टीभित्रको एकतालाई अझ सुदृढ गर्दै कार्यकर्ता पङ्क्तिलाई परिचालन गर्ने म्यान्डेट दिएको उनको भनाइ छ ।