काठमाडौं– नेपाली फिल्म क्षेत्रमा अभिनेत्री रेखा थापा र निर्देशक सबिर श्रेष्ठको सहकार्य फेरि देखिने भएको छ । उनीहरूको नयाँ फिल्म ‘छत्तीसको आँकडा’ आगामी मङ्सिर २७ गतेदेखि देशभर प्रदर्शनमा आउने भएको छ ।

अभिनेत्री निरुता सिंहको जन्मदिनको अवसर पारेर रेखाकै ‘बीआर क्याफे’मा आयोजित कार्यक्रममा फिल्मको प्रदर्शन मिति सार्वजनिक गरिएको हो । फिल्मको रिलिज मिति घोषणा भएसँगै निर्माण टिमले प्रचार–प्रसारलाई पनि अघि बढाउने तयारी गरेको छ ।

रेखा फिल्मस् र काइट्स इन्टरटेन्मेन्टको सहकार्यमा निर्माण भएको फिल्मलाई सबिर श्रेष्ठले निर्देशन गरेका हुन् । फिल्ममा रेखा थापासँगै पूजा शर्मा, महेश त्रिपाठी, पुष्प खड्का र निरुता सिंह मुख्य भूमिकामा छन् ।

फिल्ममा रेखाको जोडीका रूपमा महेश त्रिपाठी देखिँदैछन् भने पूजा शर्मासँग पुष्प खड्काको जोडी प्रस्तुत हुनेछ । विशेषगरी रेखा र पूजाको पुनः सहकार्यलाई फिल्मको एउटा चासोको विषयका रूपमा हेरिएको छ। यी दुईले यसअघि ‘उपहार’मा सँगै काम गरेका थिए।

रेखा र निर्देशक सबिर श्रेष्ठको सहकार्य भने लामो समयदेखिको हो। यी दुईले ‘कसले चोर्‍यो मेरो मन’, ‘इशारा’, ‘काली’, ‘तथास्तु’ र ‘रामप्यारी’ लगायतका फिल्ममा सहकार्य गरिसकेका छन्।

फिल्मको नेपालभर वितरणको जिम्मेवारी आरआर फिल्म्सले लिएको छ। रोहित कट्टेल र रत्न श्रेष्ठले वितरण गर्ने ‘छत्तीसको आँकडा’ले मङ्सिर २७ गतेबाट दर्शकमाझ आफ्नो कथा प्रस्तुत गर्नेछ।