काठमाडौँ – फिफा विश्वकप २०२६ अन्तर्गत समूह ‘जे’ को खेलमा जिओभानी लो सेल्सोको गोल मद्दतले साविक विजेता अर्जेन्टिनाले जोर्डन विरुद्ध सुरुवाती अग्रता बनाएको छ ।

टेक्ससको डल्लास स्टेडियममा जारी खेलको १९औं मिनेटमा मिडफिल्डर लो सेल्सोले आकर्षक गोल गर्दै अर्जेन्टिनालाई १–० को अग्रता दिलाएका हुन् । त्यसपछि खेलको ३१औं मिनेटमा प्राप्त पेनाल्टीलाई स्ट्राइकर लाउतारो मार्टिनेजले गोलमा परिणत गर्दै अग्रता दोब्बर बनाएका हुन्।

यस खेलमा नियमित कप्तान लियोनेल मेसी बिना नै मैदान उत्रिएको अर्जेन्टिनाले सुरुदेखि नै जोर्डनमाथि दबाब कायम राखेको थियो ।

यसअघि नै लगातार दुई खेल जित्दै नकआउट चरण (अन्तिम ३२) मा स्थान सुरक्षित गरिसकेको अर्जेन्टिना यस खेलमा पनि जित निकाल्दै शतप्रतिशत नतिजाका साथ समूह चरणको अन्त्य गर्ने योजनामा देखिन्छ । जोर्डन भने प्रतियोगिताबाट बाहिरिइसकेको छ ।