काठमाडौं – नेपालका युवा एमएमए स्टार रविन्द्र ढाँट अब ‘रोड टु यूएफसी’ को सेमिफाइनलमा न्यूजिल्याण्डका कासिब मुर्डोकसँग भिड्ने भएका छन् । बिहीबार चीनको मकाउमा सम्पन्न ब्यान्टमवेट क्वाटरफाइनलमा फिलिपिन्सका किम्बर्ट अलिन्टोजोनलाई दोस्रो राउन्डमै नकआउट गर्दै रविन्द्रले अन्तिम चारमा स्थान सुरक्षित गरेका हुन् ।

मिक्स्ड मार्सल आर्ट्स (एमएमए)को विश्व चर्चित प्रतियोगितामा रविन्द्रको प्रदर्शन निकै आक्रामक देखिएको थियो । पहिलो र दोस्रो दुवै राउन्डमा उनले फिलिपिनो प्रतिस्पर्धीमाथि दबाब कायम राखेका थिए । दोस्रो राउन्डमा लगातार शक्तिशाली प्रहार गरेपछि रेफ्रीले खेल रोक्दै रविन्द्रलाई विजेता घोषणा गरेका थिए ।

अब उनको सामना हुने कासिब मुर्डोक प्रतियोगिताका बलिया दाबेदारमध्ये एक मानिन्छन् । कासिबले क्वाटरफाइनलमा जापानका युनोसुके मिनामीलाई सबमिसनमार्फत पराजित गर्दै सेमिफाइनल यात्रा तय गरेका हुन् । अपराजित रहेका कासिब आक्रामक फाइटिङ शैलीका कारण चर्चित छन् ।

‘बझाङको बाघ’ भनेर चिनिने रविन्द्र रोड टु यूएफसीमा फाइट जित्ने पहिलो नेपाली फाइटर समेत बनेका छन् । उनलाई समर्थन गर्न मकाउमा हजारौं नेपाली समर्थक पुगेका थिए । रविन्द्र विजयी भएपछि समर्थकहरूले ठूलो उत्सव मनाएका थिए ।

ब्यान्टमवेट तौल समूहमा प्रतिस्पर्धा गरिरहेका रविन्द्रले यो प्रतियोगिता जिते यूएफसीको मुख्य स्टेजमा स्थान बनाउनेछन् । पछिल्लो समय उनी नेपाली एमएमएका सबैभन्दा चर्चित फाइटरको रूपमा उदाएका छन् ।