काठमाडौं – नेपाली कांग्रेसभित्रको आन्तरिक शक्ति संघर्ष अहिले थप सतहमा देखिन थालेको छ ।

तत्कालीन प्रधानमन्त्री तथा एमाले अध्यक्ष केपी शर्मा ओली र तत्कालीन गृहमन्त्री तथा कांग्रेस नेता रमेश लेखक पक्राउ परेका विषय, साथै गौरीबहादुर कार्की आयोगको प्रतिवेदन कार्यान्वयनबारे कांग्रेसले दुई फरक धारका विज्ञप्ति सार्वजनिक गरेको छ ।

पहिलो विज्ञप्ति पार्टी प्रवक्ता देवराज चालिसे मार्फत सार्वजनिक भयो, जसले घटनाप्रति पार्टीको औपचारिक धारणा प्रस्तुत गर्ने प्रयास गरेको देखिन्छ । तर त्यसको केही समयमै पूर्व कार्यवाहक सभापति पूर्णबहादुर खड्काले छुट्टै विज्ञप्ति जारी गरे । उनले पार्टीको लेटरप्याड प्रयोग गर्दै कार्यवाहक सभापतिको हैसियतमा आफ्नो धारणा सार्वजनिक गरेपछि स्थिति थप पेचिलो बनेको हो ।

दुवै विज्ञप्तिको भाषा, शैली र सन्देश फरक–फरक देखिन्छ । एउटाले संयमित प्रतिक्रिया जनाउँदा अर्कोले कडा राजनीतिक सन्देश दिएको रूपमा बुझिएको छ ।