काठमाडौं– पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई सरकारले पक्राउ गरेपछि नेकपा एमालेका नेता कर्णबहादुर थापाले विरोध जनाएका छन्।

थापाले पार्टी अध्यक्ष ओलीसँग पार्टीभित्र वैचारिक संघर्षको विवरण दिँदै पनि कार्की आयोगको प्रतिवेदनमा आधारित पक्राउ पूर्णतया गलत भएको बताए।

‘पार्टी अध्यक्ष कमरेड केपी शर्मा ओली र उहाँलाई पार्टीभित्र मनपरि गर्न उकास्ने र गलत काममा सहयोग गर्ने पात्र र प्रवृत्तिसँग वैचारिक संघर्ष थियो, त्यो विधिसम्मत् रूपमा जारी रहनेछ’, उनलेे भनेका छन्, ‘तर कार्की आयोगको पूर्वाग्रह र प्रतिशोधमा आधारित प्रतिवेदनलाई आधार मानेर गरिएको गिरफ्तारी शतप्रतिशत गलत छ।’

थापाले बालेन सरकारको कदमलाई राज्य आतंकको रूपमा उल्लेख गर्दै सम्पूर्ण पार्टी पंक्तिले एकताबद्ध भएर विरोधमा उत्रनुपर्ने बताए।

उनले कार्की आयोगले फौजदारी संहिताको दफा १८१ र १८२ अनुसारको अभियोग लगाउने सिफारिस कानुनसम्मत नभएको र राजनीतिक व्यक्तिलाई अपराधी प्रमाणित गर्न नसकिने दाबी गरेका छन्।

उनले भने, ‘निरंकुशताको कालरात्रीमा दबाउन खोजिएका स्वतन्त्रताका आवाज सफल भएनन्। यस युगमा कुनै पनि खाले षड्यन्त्र र गैरकानुनी योजना सफल हुने छैन। संयमताका साथ, योजनावद्ध र बहादुरीसाथ अघि बढौं।’