काठमाडौं– पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई सरकारले पक्राउ गरेपछि नेकपा एमालेका उपमहासचिव योगेश भट्टराईले सरकारको कदमको आलोचना गरेका छन्।

सामाजिक सञ्जालमार्फत प्रतिक्रिया दिँदै भट्टराईले लोकतान्त्रिक व्यवस्थामा राज्य र सरकार आक्रामक नभई संयमित हुनुपर्ने बताएका छन्।

उनले प्रतिशोध र बदलाको राजनीति भन्दा संवाद र सहकार्यको बाटो अपनाउन सरकारलाई आग्रह गरेका छन्।
‘लोकतान्त्रिक व्यवस्थामा राज्य र सरकार आक्रामक होइन, संयम हुनु पर्दछ। प्रतिशोध र बदला होइन, संवाद र सहकार्यको बाटोमा जानु पर्दछ,’ भट्टराईले उल्लेख गरेका छन्।

उनले कानुनी राज्य र विधिको शासनको उपहास स्वीकार्य नभएको उल्लेख गर्दै घटनाको न्यायिक, निष्पक्ष र पारदर्शी छानबिन हुनुपर्ने माग गरेका छन्।

यसका साथै, एमाले अध्यक्ष ओली र नेपाली कांग्रेस नेता लेखकको गिरफ्तारीको निन्दा गर्दै अविलम्ब रिहाइको माग गरेका छन्।

भट्टराईले जनताबाट प्राप्त जनादेशको दुरुपयोग नगर्न सरकारको ध्यानाकर्षण गराउँदै आफ्नो पार्टीले कानुनी र राजनीतिक बाटो अपनाउने बताएका छन्।

उनले संयम र धैर्यताका साथ एकताबद्ध भएर प्रतिकूल परिस्थितिको सामना गर्ने उल्लेख गरेका छन्।