काठमाडौं– भदौ १० गते भोटेकोसीमा आएको विनाशकारी बाढीले जनधनको ठूलो क्षति पुर्याउनुका साथै पूर्वाधार क्षेत्रमा पनि ठूलो क्षति पुर्याएको छ ।
बाढीले नेपालको चीनसँग हुने मुख्य व्यापारिक रसुवा नाकाको दुवै देशतर्फको भन्सार कार्यालय र सुख्खा बन्दरगाहलाई पूर्ण रूपमा क्षति पुर्यायो । साथै, बाढीका कारण भोटेकोशी र त्रिशूली नदीको तटीय क्षेत्रको मुख्य सडक पूर्वाधारमा निकै ठूलो क्षति पुगेको छ ।
जसकारण रसुवा नाका हुँदै चीन र नेपाल बीचमा हुने द्विदेशीय व्यापार अब पुनर्निर्माण नहुनेबेलासम्म ठप्प हुने देखिएको छ । जसका कारण नेपालको वैदेशिक व्यापार र आपूर्ति श्रृंखला प्रभावित हुनसक्ने विगतका तथ्यांकहरूले देखाएका छन् ।
गत वर्ष रसुवा भन्सारबाट भएको थियो आधा खर्बको आयात
भन्सार विभागको तथ्यांकअनुसार गत आर्थिक वर्षमा नेपालमा २० खर्ब ९६ अर्ब ३७ करोड ९० लाख ७० हजार रुपैयाँ बराबरको आयात हुँदा चीनबाट ४ खर्ब २५ अर्ब २४ करोड ७० लाख ११ हजार रुपैयाँ बराबरको वस्तु आयात भएको थियो । जुन कुल आयातको २०.२८ प्रतिशत हो ।
जसमध्ये मुस्ताङ भन्सार नाकाबाट १४ अर्ब ४० करोड ६७ लाख २८ हजार, रसुवाबाट ४५ अर्ब ७३ करोड ८२ लाख ६४ हजार र तातोपानीबाट ४७ अर्ब ४८ करोड ६१ लाख १८ हजार बराबरको वस्तु आयात भएको थियो ।
गत आर्थिक वर्षमा चीनका तीनवटा नाकाबाट १ खर्ब ७ अर्ब ६३ करोड ११ लाख १० हजार रुपैयाँको वस्तु आयात भएको थियो ।
विभागको तथ्यांकअनुसार चीनबाट आयात हुने कुल सामग्रीको ठूलो हिस्सा चीनतर्फका नाकाभन्दा पनि अन्तर्राष्ट्रिय विमानस्थल र अन्य नाका हुँदै आएको देखिन्छ ।
साथै, गत आर्थिक वर्षमा नेपालबाट भएको वैदेशिक व्यापारमध्ये रसुवा नाकाबाट ८९ करोड ४६ लाख १ हजार रुपैयाँ बराबरको निर्यात भएको थियो ।
गत आर्थिक वर्षमा आएको बाढीको कारण तातोपानी नाकातर्फको सडकमा समस्या आएको छ ।
जसको पुनर्निर्माण पूरा भएको छैन । चालु आर्थिक वर्षको साउन महिनाको आयातको तथ्यांक हेर्दा तातोपानी नाकामार्फत हुने आयात घटेको छ भने रसुवा नाकामार्फत हुने निर्यात बढेको छ ।
विभागको तथ्यांकअनुसार चालु आर्थिक वर्षको साउन महिनामा रसुवा भन्सार नाकाबाट ५ अर्ब ६७ करोड ८७ लाख २७ हजार रुपैयाँ बराबरको वस्तु आयात भएको छ, जुन आयात सो अवधिको कुल आयातको ३.०३ प्रतिशत हो ।
सोही अवधिमा तातोपानीबाट हुने आयात घटेर ०.०७ प्रतिशतमा झरेको छ । जसले गर्दा रसुवा नाका अब बन्द हुँदा नेपालको आयात श्रृंखलामा ठूलो असर पर्ने स्पष्ट देखिन्छ ।
प्रतिक्रिया