काठमाडौं– असार महिनाको तेस्रो हप्ताबाट प्रधानमन्त्री बालेन्द्र शाह ‘बालेन’ले सुरु गरेको निजी क्षेत्रका प्रतिनिधिसँगको भेटघाटमा अर्थमन्त्री स्वर्णिम वाग्ले देखिएनन् । 

यो अवधिमा प्रधानमन्त्री बालेनले विभिन्न १२ क्षेत्रका प्रतिनिधिसँग कुराकानी गरे । 

सामान्यतया ती सबै प्रतिनिधिका माग र समस्या अर्थ मन्त्रालय र सो मातहतका निकायसँग जोडिने प्रकृतिका थिए । तर, प्रधानमन्त्री र निजी क्षेत्रको श्रृंखलाबद्ध छलफलमा अर्थमन्त्री र अर्थ मन्त्रालय भने छुटे ।

प्रधानमन्त्री बालेनले निजी क्षेत्रको भेटघाटलाई तीव्र बनाउँदा अर्थमन्त्री डा वाग्लेले सो अवधिमा बजेट कार्यान्वयन मार्गदर्शन जारी, राजस्व समीक्षा बैठक, अष्ट्रेलियाका युवाहरूसँग छलफल लगायतका काममा आफूलाई व्यस्त बनाएका थिए । 

तर, बजेटका विभिन्न प्रावधानमा आलोचनाको केन्द्र बन्नेदेखि शक्ति संघर्षमा कमजोर देखिएका अर्थमन्त्री डा वाग्लेले मंगलबारबाट फेरि प्रधानमन्त्रीले नै चासो देखाएको विषय सुरु गर्दैछन् । मंगलबार अर्थमन्त्री डा वाग्लेले उत्पादनमूलक उद्योग सञ्चालन गर्दै आएका तीन दर्जन उद्योगीलाई बोलाएर ‘बजेट कार्यान्वयन विशेष छलफल कार्यक्रम’ राखेका छन् ।

अर्थमन्त्रीको सो कार्यक्रममा उद्योग मन्त्रालयका सचिव सहभागी हुने जनाइएको छ भने अन्य मन्त्री र अन्य मन्त्रालयको प्रतिनिधित्वको विषय भने खुलाइएको छैन । प्रधानमन्त्री कार्यालयको भेटघाट र छलफलमा कार्यान्वयन गर्ने अर्थ मन्त्रालय छुट्नु र अर्थ मन्त्रालयले फेरि प्रधानमन्त्रीले नै भेटघाट गरेका क्षेत्रलाई दोहोर्याउनुले प्रधानमन्त्री र अर्थमन्त्रीबीचमा शक्ति संघर्ष कायमै रहेको देखाएको छ ।

प्रधानमन्त्री बालेनले असार २३ गते उद्योग वाणिज्य क्षेत्रका छाता संगठन नेपाल उद्योग वाणिज्य महासंघ, नेपाल चेम्बर अफ कमर्स र नेपाल उद्योग परिसंघका प्रतिनिधिसँगबाट निजी क्षेत्रसँग संवाद सुरु गरेका थिए । उनले सो छलफललाई निर्माण, ऊर्जा, होटेल, महिला उद्यमी, जुत्ता उत्पादक, पुँजी बजार, पोशाक उत्पादक, हस्तकाल उद्यमी, अर्ग्यानिक उत्पादक, निर्यातजन्य उद्यमी लगायतका क्षेत्रसम्म पुर्‍याएका थिए ।

साथै, प्रधानमन्त्री कार्यालयले सो छलफललाई अझै बिस्तार गर्ने समेत जनाइएको छ ।