काठमाडौं – बेलायतमा अध्ययनरत नेपाली विद्यार्थीहरूले भोगिरहेका समस्या दिनप्रतिदिन गम्भीर बन्दै गएको भन्दै सरोकारवालाले तत्काल प्रभावकारी कदम चाल्न सरकार र सम्बन्धित निकायसँग आग्रह गरेका छन्।

शुक्रबार काठमाडौंमा आयोजित पत्रकार सम्मेलनमा सहभागी विज्ञहरूले बेलायत र आयरल्यान्डमा नेपाली विद्यार्थीको मृत्यु, बेघर हुने अवस्था, अध्ययनबाट बाहिरिनुपर्ने बाध्यता, लागूऔषध दुर्व्यसन, आर्थिक संकट तथा मानसिक स्वास्थ्यसम्बन्धी समस्या बढ्दै गएको बताएका हुन् ।

उपलब्ध तथ्यांकअनुसार सन् २०२५ मा बेलायत र आयरल्यान्डमा पाँचदेखि छ जना नेपाली विद्यार्थीको मृत्यु भएको थियो। यस वर्ष पनि कम्तीमा दुई जना नेपाली विद्यार्थीले ज्यान गुमाइसकेका छन् । सरोकारवालाले यी घटनाले नेपाली विद्यार्थीले भोगिरहेका गम्भीर चुनौतीलाई उजागर गरेको बताएका छन् ।

पत्रकार सम्मेलनमा बोल्दै पश्चिम इङ्ग्ल्यान्ड विश्वविद्यालयका डा. पुष्ष पन्त र बेलायतस्थित नेपाली विद्यार्थी समाजहरूको साझा सञ्जालका प्रतिनिधि पवन कँडेलले धेरै विद्यार्थी पर्याप्त जानकारी र तयारीबिनै विदेश जाने तथा त्यहाँको आर्थिक, शैक्षिक र व्यक्तिगत चुनौतीबारे यथार्थ जानकारी नपाउने समस्या रहेको बताए ।

उनीहरूले नेपालमा रहेका शैक्षिक परामर्श संस्थाको प्रभावकारी नियमन गर्न, विदेश जानुअघि विद्यार्थी र अभिभावकलाई अनिवार्य तथा गुणस्तरीय परामर्श उपलब्ध गराउन र बेलायतमा अध्ययनरत नेपाली विद्यार्थीका लागि थप सुदृढ सहयोग तथा कल्याणकारी व्यवस्था विकास गर्नुपर्ने सुझाव दिएका छन् ।

उनीहरूको भनाइमा विद्यार्थी र उनीहरूका परिवारलाई बेलायतमा अध्ययन गर्दा आउने अवसरसँगै सम्भावित चुनौतीबारे पनि सही, सन्तुलित र यथार्थपरक जानकारी दिन आवश्यक छ, ताकि उनीहरूले सोचविचार गरेर निर्णय लिन सकून् ।

वक्ताहरूले बेघर हुने, अध्ययन छोड्नुपर्ने, लागूऔषध दुव्र्यसनमा फस्ने तथा विद्यार्थीको मृत्यु हुनेजस्ता समस्या बेलायतमा रहेका अन्य दक्षिण एसियाली मुलुकका विद्यार्थीको तुलनामा नेपाली विद्यार्थीमा बढी देखिएकोप्रति पनि चिन्ता व्यक्त गरेका छन् ।

यस पहललाई संयुक्त सञ्जाल नामक गैरनाफामूलक संस्था, बेलायत–नेपाल द्विपक्षीय उच्च शिक्षा सहकार्य सञ्जाल, बेलायतमा रहेका नेपाली विद्यार्थीका लागि सञ्चालित सहायता सेवा तथा बेलायतस्थित नेपाली विद्यार्थी कल्याण परिषद्ले समर्थन गरेका छन् ।

सरोकारवालाले नेपाल र बेलायत सरकार, शैक्षिक संस्था, शैक्षिक परामर्शदाता तथा विद्यार्थी कल्याणसँग सम्बन्धित संस्थाबीच प्रभावकारी समन्वय र सहकार्य भए मात्रै बेलायतमा अध्ययनरत नेपाली विद्यार्थीको सुरक्षा, कल्याण र समग्र शैक्षिक अनुभवमा सुधार ल्याउन सकिने बताएका छन् ।