काठमाडौं– जेन–जी आन्दोलनका क्रममा आयोजक समूहले फर्किन आग्रह गर्दा पनि हामी नेपालका अध्यक्ष सुधन गुरुङले अटेरी गर्दै प्रदर्शन स्थलमा सक्रिय रहेको तथ्य सार्वजनिक भएको छ ।

मानव अधिकारसम्बन्धी प्रतिवेदनअनुसार २०८२ भदौ २३ गते बिहान करिब ९ बजे जेन–जी अभियानका अगुवा रक्षा बम, जस्टिन ओझा लगायतको समूह माइतीघर मण्डला पुगेपछि ‘हामी नेपाल’ का सुजन गुरुङले टेन्ट, स्वास्थ्य स्वयंसेवक, तीन वटा एम्बुलेन्ससहितको तयारी गरेको देखिएको थियो ।

त्यसक्रममा रक्षा बम र जस्टिन ओझालगायतले सुधन गुरुङसँग विवाद गर्दै उनलाई प्रदर्शनबाट फर्किन आग्रह गरेका थिए ।

प्रतिवेदनमा शान्तिपूर्ण भनिएको प्रदर्शनमा सुरुमै एम्बुलेन्स, प्राथमिक उपचार र स्वास्थ्य स्वयंसेवकको व्यवस्था गर्नुले आन्दोलन हिंसात्मक हुन सक्ने पूर्वसंकेत देखिएको उल्लेख छ । प्रदर्शनकारीले प्रहरीको ब्यारिकेड तोड्दै नयाँ बानेश्वरतर्फ अघि बढेपछि आन्दोलन उत्तेजक र हिंसात्मक बनेको तथा गलत तत्वको घुसपैठ भएको सुरक्षा अधिकारीहरूको बयानमा उल्लेख गरिएको छ ।

यस्तो अवस्था सिर्जना हुँदासमेत आयोजकले घुसपैठ रोक्न प्रभावकारी प्रयास नगरेको र सुरक्षा निकायले पनि पर्याप्त विश्लेषण तथा तयारी गर्न नसकेको प्रतिवेदनको निष्कर्ष छ ।