काठमाडौं – नेपालले दिगो विकास लक्ष्य हासिल गर्दै अति कम विकसित मुलुकबाट विकासोन्मुख राष्ट्रमा स्तरोन्नति हुन आगामी चार वर्षभित्र थप ७ खर्ब ५५ अर्ब रुपैयाँ लगानी आवश्यक पर्ने देखिएको छ ।

बुधबार सार्वजनिक गरिएको आर्थिक वर्ष ०८२/०८३ को आर्थिक सर्वेक्षण प्रतिवेदनले उक्त लक्ष्य हासिल गर्न आवश्यक लगानी र सुधारका क्षेत्रहरूबारे सुझाव दिएको हो ।

प्रतिवेदन अनुसार नेपालले सन् २०३० भित्र दिगो विकास लक्ष्य पूरा गरे मात्र विकासोन्मुख राष्ट्रका रूपमा स्तरोन्नति हुने अवसर पाउनेछ ।

सर्वेक्षणमा उल्लेख गरिए अनुसार नेपालले विकासोन्मुख राष्ट्रका रूपमा स्तरोन्नति हुन ९४.८५ प्रतिशत लक्ष्य सूचक हासिल गर्नुपर्ने हुन्छ । तर हालसम्मको प्रगति ६८.५८ स्कोरमा सीमित रहेको छ ।

गत वर्ष यही सूचक ४०.४ प्रतिशत रहेको थियो । यस आधारमा एक वर्षमै करिब २८ प्रतिशतले सुधार भएको देखिएको प्रतिवेदनले जनाएको छ ।

सरकारले पूर्वाधार, सामाजिक विकास, स्वास्थ्य, शिक्षा र उत्पादनमूलक क्षेत्रमा लगानी वृद्धि नगरे दिगो विकास लक्ष्य समयमै हासिल गर्न चुनौती रहने पनि प्रतिवेदनमा औँल्याइएको छ ।