काठमाडौं– पञ्जाबी गायक तथा अभिनेता दिलजीत दोसाँझलाई लक्षित गर्दै बम विस्फोटको धम्की आएपछि भारतको लुधियानामा सुरक्षा व्यवस्था कडा बनाइएको छ । नगर आयुक्तको आधिकारिक इमेलमा आएको धम्कीपूर्ण सन्देशले प्रशासन र सुरक्षा निकायलाई उच्च सतर्कतामा राखेको हो ।

सोमबार बिहान ७:२८ बजे पठाइएको इमेलमा लुधियानाकी मेयर इन्द्रजीत कौरको घर र कार्यालयसँगै दिलजीत दोसाँझको घरमा पनि बम विस्फोट गराइने चेतावनी दिइएको थियो । इमेलमा दिउँसो १:११ बजे मेयरमाथि आक्रमण हुने र राति ९:११ बजे दोसाँझको घरमा विस्फोट गराइने उल्लेख गरिएको बताइएको छ ।

धम्कीपूर्ण सन्देशमा गायक दिलजीतलाई सहयोग गर्ने व्यक्तिहरूलाई समेत निशाना बनाइने चेतावनी दिइएको थियो ।

साथै, १९८४ को सिख दङ्गाको प्रसंग जोड्दै भड्काउने र हिंसात्मक भाषा प्रयोग गरिएको भारतीय सञ्चारमाध्यमले जनाएका छन् । इमेलको अन्त्यमा सन्देशलाई एक पृथकतावादी संगठनसँग जोड्ने प्रयाससमेत गरिएको बताइएको छ ।

धम्की प्राप्त भएपछि प्रहरीले तुरुन्तै नगर निगम कार्यालय खाली गराएर बम स्क्वाड र सुरक्षाकर्मी परिचालन गरेको थियो। कार्यालय परिसर र आसपासका क्षेत्रमा व्यापक खोजी अभियान चलाइए पनि प्रारम्भिक जाँचमा कुनै शंकास्पद वस्तु फेला परेन । त्यसपछि कर्मचारीहरूलाई पुनः कार्यालय प्रवेश गर्न अनुमति दिइएको थियो ।

हाल मेयरको कार्यालय, सरकारी भवन र अन्य संवेदनशील स्थानहरूमा सुरक्षा व्यवस्था थप कडा पारिएको छ ।

साइबर सेलले इमेल पठाउने व्यक्तिको आईपी ठेगाना पहिचान गर्ने प्रयास गरिरहेको छ भने प्रहरी अधिकारीहरूले घटनालाई गम्भीर रूपमा लिएर विस्तृत अनुसन्धान अघि बढाइएको बताएका छन् ।