काठमाडौं- उद्योग, वाणिज्य तथा आपूर्ति मन्त्री गौरी कुमारीले चिया निर्यातमा देखिएको समस्यालाई दीर्घकालीन रुपमै समाधान गर्न कूटनीतिक पहल भइरहेको बताएकी छन् ।

बुधबार प्रतिनिधिसभा बैठकमा विभिन्न समयमा सांसदहरूले उठाएका प्रश्नको जवाफ दिँदै मन्त्री कुमारीले चिया निर्यातमा देखिएको समस्या हालका लागि पहल भइरहेको बताइन् ।

उनले यस समस्याको दीर्घकालीन रुपमै समाधान गर्न कूटनीतिक पहल भइरहेको बताइन्। ‘यसका लागि भारत सरकारलाई पत्राचार गरिएको छ, चिया व्यवसायीसँग छलफल गरिएको छ’, उनले भनिन्, ‘भारतस्थित नेपाली दूतावासमार्फत् निरन्तर समन्वय भइरहेको छ।’

उनले हाल नेपालमा वार्षिक करिब २ करोड ६१ लाख किलो चिया उत्पादन हुने गरेको बताइन्र । १८ जिल्लामा २० हजार ६ सय हेक्टर क्षेत्रफलमा चिया खेती भइरहेको तथ्यांक उनले सुनाइन् ।

आर्थिक वर्ष २०८१/८२ मा नेपालबाट ४ अर्ब ५९ करोड रुपैयाँ बराबरको चिया निर्यात भएको थियो। जसमा ८० देखि ९० प्रतिशत निर्यात भारततर्फ निर्यात हुने गरेको उनले बताइन् ।