काठमाडौँ – डिफेन्डिङ च्याम्पियन रोयल च्यालेन्जर्स बेंगलुरु इन्डियन प्रिमियर लिग (आईपीएल) २०२६ को फाइनल पुगेको छ । मंगलबार भएको पहिलो क्वालिफायर मा गुजरात टाइटन्सलाई ९२ रनले हराउँदै आरसिबी फाइल पुगेको हो । अघिल्लो सिजनको विजेता आरसिबी लगातार दोस्रो पटक फाइनल पुग्न सफल भएको हो ।

गत वर्ष पहिलो पटक च्याम्पियन भएको बेंगलुरुसामु उपाधि रक्षा गर्ने अवसर हुनेछ । अब बुधबार हुने एलिमिनेटरमा सनराइजर्स हैदरावाद र राजस्थान रोयल्स खेल्नेछन् । त्यसमा विजयी हुने टिमले क्वालिफायर–२ मा गुजरातको सामना गर्नेछ । त्यसकै विजेताले फाइनलमा बेंगलुरुको सामना गर्नेछ ।

धर्मशालामा भएको खेलमा जितका लागि २५५ रनको कीर्तिमानी लक्ष्य पछ्याएको गुजरात १९.३ ओभरमा १६२ रनमा अलआउट हुँदा आरसिबीले ९२ रनको शानदार जित निकालेको हो ।

ब्याटिङमा निकै कमजोर प्रदर्शन गरेको गुजरातका लागि राहुल तेवतियाले सर्वाधिक ६८ रन बनाए । उनले ४३ बलमा ८ चौका र ४ छक्का प्रहार गरे पनि टोलीलाई जिताउन सकेनन् । बेंगलुरुका बलर ज्याकोब डफीले ३ विकेट हात पारे ।

त्यसअघि पहिले ब्याटिङको निम्तो पाएको बेंगलुरुले ५ विकेट गुमाएर २५४ रन बनाएको थियो । यसमा सबैभन्दा ठूलो योगदान कप्तान रजत पाटीदारको रह्यो । उनले ३३ बलमा ९३ रन जोडे । त्यस क्रममा उनले ५ चौका र ९ छक्का प्रहार गरे ।

यस्तै बेंगलुरुका लागि विराट कोहली र क्रुनाल पाण्ड्याले समान ४३ रन बनाए । रजतले क्रुनालसँग मिलेर चौथो विकेटका लागि आक्रामक ९५ रनको साझेदारी गरे ।