काठमाडौं- पश्चिम एसियामा बढ्दो तनावका बीच रुसी कच्चा तेल बोकेको एउटा ठूलो जहाज भारत आइपुगेको छ । ‘एमटी एक्वा टाइटन’ नामक सो ट्याङ्करलाई मङ्गलुरु रिफाइनरी एन्ड पेट्रोकेमिकल्स लिमिटेड (एमआरपीएल) ले चार्टर गरेको हो । आइतबार आइपुगेको यो जहाज अहिले मङ्गलुरु तटभन्दा केही टाढा अरब सागरमा लङ्गर हालेर बसेको छ।

विश्वभर ऊर्जा आपूर्तिको चिन्ता बढिरहेका बेला यो तेल ट्याङ्कर भारत आइपुग्नुलाई महत्त्वपूर्ण मानिएको छ । भौगोलिक तनाव र आपूर्ति प्रणालीमा आएको अवरोधका कारण अहिले अन्तर्राष्ट्रिय बजारमा इन्धनको उपलब्धता अस्थिर छ । यस्तो अवस्थामा भारतले आफ्नो ऊर्जा सुरक्षाका लागि विभिन्न स्रोतबाट तेल आयात गरिरहेको छ।

यसैगरी, आइतबार नै अमेरिकाको टेक्ससबाट तरल पेट्रोलियम ग्यास (एलपीजी) बोकेको अर्को मालवाहक जहाज पनि मङ्गलुरु बन्दरगाहमा आइपुगेको छ । यसरी रुसबाट तेल र अमेरिकाबाट ग्यास एकैसाथ आइपुग्दा भारतको इन्धन भण्डारणमा राहत मिल्ने देखिएको छ । यी दुवै जहाजको आगमनले हालको कठिन समयमा पनि भारतको ऊर्जा आपूर्ति प्रणाली सुचारु रहेको सङ्केत गरेको छ ।