काठमाडौं – टिकटकबाट चर्चामा आएका पारस बम (कुल ब्वाइ) र नायिका दिव्या रायमाझीले फिल्म ‘बेहुली’मा अनस्क्रिन रोमान्स गर्ने भएका छन् ।

शुभमुहूर्त गर्दै बिहीबार यस फिल्म निर्माण र प्रदर्शन मिति घोषणा गरिएको हो ।

निर्माता अर्जुन पोखरेलका अनुसार यस फिल्मको छायाङ्कन यही साताबाट सुरु हुनेछ भने भदौ १२ लाई प्रदर्शन मिति घोषणा गरिएको छ ।

संगीतकार अर्जुन पोखरेल यही ‘बेहुली’बाट निर्माणमा डेब्यू गर्ने भएका हुन् ।

माधव शर्माको कथामा बन्ने यस फिल्मको निर्देशक सशान कँडेल हुन् । गत वर्ष प्रदर्शनमा आएको फिल्म ‘होस्टल ३’मा उनीहरू सोही जिम्मेवारीमा थिए ।

निर्देशक कँडेलले कुल ब्वाइलाई अर्को फिल्ममा पनि दोहोर्‍याएका हुन् । अर्थात्, फिल्ममा डेब्यू गराउने निर्देशकसँगै उनले दोस्रो फिल्म गरेका हुन् ।

नायक दिलिप रायमाझीकी छोरीसमेत रहेकी दिव्या र कुल ब्वाइले भने पहिलो पटक स्क्रिन सेयर गर्न लागेका हुन् ।

फिल्ममा सुशान्त कार्की, पदम तामाङ, सन्तोष बानिया, सरिता गिरी, लोकेन्द्र लेखक, सबिन कट्टेल र समायरा थापा मगर लगायतका कलाकारहरूको पनि अभिनय रहनेछ।