नयाँदिल्ली- मदिरा घोटाला प्रकरणमा दिल्ली अदालतले पूर्व मुख्यमन्त्री अरविन्द केजरीवाल र उपमुख्यमन्त्री मनीष सिसोदियालाई सीबीआई मुद्दामा सफाइ दिएको छ।

राउज एभेन्यू कोर्टले शुक्रबार दिएको आदेशमा दुवैविरुद्ध पर्याप्त प्रमाण नभएकाले आरोप पुष्टि नहुने उल्लेख गरेको छ।

यस प्रकरणमा केन्द्रीय अन्वेषण ब्यूरो (सीबीआई)ले २३ जनाविरुद्ध आरोपपत्र दर्ता गरेको थियो। तर अदालतले सबैविरुद्धको आरोप पुष्टि हुन नसक्ने जनाउँदै सफाइ दिने निर्णय गरेको हो ।

त्यसपछि अदालत बाहिर सञ्चारकर्मीसँग कुरा गर्दै केजरीवाल भावुक बने। प्रतिक्रिया दिने क्रममा उनी भावुक भएर रून पुगे।

उनले भने, ‘पछिल्ला केही वर्षदेखि भाजपाले निरन्तर मदिरा घोटाला भन्दै हामीमाथि आरोप लगाउँदै आयो। आज अदालतले सबै आरोप खारेज गरिदिएको छ। हामीले सधैं भारतीय न्याय प्रणालीमा भरोसा राख्यौँ। न्याय दिलाउनुभएकोमा न्यायाधीशप्रति आभारी छु। सत्यको जित भएको छ।’

उनले प्रधानमन्त्री नरेन्द्र मोदी र गृहमन्त्री अमित शाहमाथि राजनीतिक षड्यन्त्र रचेको आरोप लगाए। ‘आम आदमी पार्टीलाई समाप्त पार्न पाँच शीर्ष नेतालाई जेल हालियो। सिटिङ मुख्यमन्त्रीलाई घरबाट तानेर जेल हालिएको इतिहासमा पहिलो पटक हो। मलाई छ महिना र मनीष सिसोदियालाई दुई वर्ष जेलमा राखियो,’ उनले भने।

केजरीवालले आफूले जीवनभर इमानदारी कमाएको दाबी गर्दै झुटा मुद्दा लगाइएको आरोप दोहोर्‍याए। ‘सत्ताका लागि देश र संविधानसँग खेलबाड नगर्नुहोस्। देशमा महँगी, बेरोजगारी, सडकको अवस्था र प्रदूषण जस्ता समस्या छन्। ती समाधान गरेर जनताको विश्वास जित्नुहोस्,’ उनले प्रधानमन्त्रीलाई आग्रह गरे।

उता सिसोदियाले अदालतको निर्णयलाई संविधान र सत्यको जित भएको प्रतिक्रिया दिएका छन्। उनले भीमराव अम्बेडकरप्रति गर्व व्यक्त गर्दै ‘हामीलाई यस्तो संविधान दिएकोमा आभारी छौं, आज फेरि सत्यको विजय भएको छ’ भने।