नयाँदिल्ली- मदिरा घोटाला प्रकरणमा भारतको राजधानी सहर नयाँ दिल्लीका पूर्वमुख्यमन्त्री अरविन्द केजरीवाल र मन्त्री मनीष सिसोदियालाई दिल्लीस्थित राउज एभेन्यू कोर्टले सफाइ दिने निर्णय गरेको छ।

केजरीवाल यसअघि उक्त प्रकरणमा जेलमा बसेर जमानतमा रिहा भएका थिए। उनी १३ जुलाई २०२४ मा जेलबाट रिहा भएका थिए। त्यही दिन भारतको सर्वोच्च अदालतले सीबीआईसँग सम्बन्धित मुद्दामा पनि उनलाई जमानत दिएको थियो।

मदिरा घोटाला प्रकरणमा केजरीवालविरुद्ध प्रवर्तन निर्देशनालय (ईडी) र केन्द्रीय अन्वेषण ब्यूरो (सीबीआईI) दुवैले मुद्दा दर्ता गरेका थिए। ईडीले उनलाई २१ मार्च २०२४ मा पक्राउ गरेको थियो।

त्यसपछि २६ जुनमा सीबीआईले जेलबाटै उनलाई हिरासतमा लिएको थियो। ईडीसम्बन्धी मुद्दामा भने उनलाई १२ जुलाईमा सर्वोच्च अदालतबाट जमानत प्राप्त भएको थियो।