काठमाडौं– भरतपुरका ठाकुरप्रसाद कँडेल र लिलावती सापकोटा बिहीबार बिहानैदेखि भरतपुर अस्पतालको ‘पोष्टमार्टम घर’बाहिर छन् । उनीहरूले हातमा दुई युवकको फोटो बोकेका छन् ।

ती दुई युवक हुन् – माधव न्यौपाने र सबिन न्यौपाने । यी दुई जना नातामा लिलावतीका भाइ पर्छन् । तिब्बत हुँदै नेपालतर्फ बुधबार बिहान आएको बाढीमा परेर उनीहरू बेपत्ता छन् ।

ठाकुरकाअनुसार माधव चीन र नेपालतर्फ सामान आयात–निर्यातमा संलग्न छन् । सबिन बैंकका कर्मचारी हुन् । उनीहरू रसुवाबाट बगेर आएको शव चितवनमा भेटिने आशमा अस्पतालको ‘पोष्टमार्टम घर’ आइपुगेका हुन् ।

संकलन गरेर ल्याइएका शव पनि उनीहरूले हेरे । त्यहाँ दुवै भेटिएनन् । उनीहरूले संकलित शवको विक्षिप्त अवस्था पनि सुनाए । ‘केही शवको टाउको नै छैन । केही शव चिनियाँ नागरिकजस्तो देखियो,’ कहालीलाग्दो अवस्था सुनाउँदै ठाकुरले थपे, ‘हामीले खोजिरहेकाहरू यहाँ भेटिएनन् ।’

अस्पतालको शव गृहबाहिर अन्य बेपत्ताका परिवार र आफन्त पनि जम्मा भएका छन् । उनीहरूले फोटो प्रिन्ट गरेर र मोबाइलमा आफूले खोजी गरिरहेकाहरूको तस्बिर लिएर आएका छन् ।

तस्बिर : निशा श्रेष्ठ/नेपाल फोटो लाइब्रेरी