काठमाडौँ । नेपाली कांग्रेसले नयाँ क्रियाशील सदस्यता नवीकरण गर्ने अन्तिम मिति साउन १४ गतेसम्म तोकेको छ ।

सोमबार पार्टीको केन्द्रीय कार्यालय बीपी स्मृति भवन, बीपी नगर ललितपुरमा महामन्त्री एवं सदस्यता व्यवस्थापन केन्द्रीय समितिका संयोजक प्रदीप पौडेलको अध्यक्षतामा बसेको सदस्यता व्यवस्थापन केन्द्रीय समितिको बैठकले यस्तो निर्णय गरेको हो।

बैठकले प्रतिनिधिसभा क्षेत्र र वडा तहमा वडा सभापतिमार्फत नयाँ क्रियाशील सदस्यता आवेदन तथा अनलाइन प्रणालीमार्फत स्वयं आवेदन भरेर वडा सभापतिको पोर्टलमा होल्डमा रहेका सदस्यता आवेदन साउन १४ गतेभित्र अनुमोदन गरिसक्नुपर्ने निर्णय गरेको छ।

साथै पालिका र प्रतिनिधिसभा क्षेत्रले मातहतबाट अनुमोदन भएर आएका आवेदन प्राप्त भएको मितिले तीन–तीन दिनभित्र अनुमोदन गरिसक्नुपर्ने निर्णय पनि गरिएको छ।

बैठकले भातृ तथा शुभेच्छुक संस्था, इन्टरनेट पहुँच कम भएका उच्च हिमाली तथा विकट पहाडी जिल्लाका अद्यावधिक हुन छुटेका सदस्यहरूको विवरण एक्सेल फारममार्फत केन्द्रबाट अद्यावधिक गरिने निर्णय गरेको छ। त्यस्ता फारम साउन १५ गतेभित्र केन्द्रमा बुझाइसक्नुपर्ने र प्राप्त विवरणको सदस्यता केन्द्रले अद्यावधिक गर्ने निर्णय पनि गरिएको छ।

यस्तै, डिजिटल प्रणालीमा सदस्यता अद्यावधिक गर्न नसकेका तहका सभापतिको हकमा वैकल्पिक व्यवस्था गरी केन्द्रीय प्रतिनिधिको सिफारिसमा सभापति तोक्ने र त्यसलाई केन्द्रीय कार्यसमितिबाट अनुमोदन गराउने निर्णय बैठकले गरेको छ।

बैठकले विविध कारणले क्रियाशील सदस्यता अद्यावधिक गर्न छुट भएका सदस्यहरूको सदस्यता केन्द्रीय प्रतिनिधिको सिफारिसका आधारमा केन्द्रबाट अद्यावधिक गर्ने निर्णय पनि गरेको छ।

त्यस्तै, कुनै वडामा क्रियाशील सदस्य संख्या ४० भन्दा कम र ३५ वर्षभन्दा कम उमेर समूहका सदस्य पाँच जनाभन्दा कम भएको अवस्थामा केन्द्रीय प्रतिनिधिको सिफारिसमा केन्द्रबाट क्रियाशील सदस्यता प्रदान गर्ने निर्णय पनि बैठकले गरेको छ।