काठमाडौं- राष्ट्रिय स्वतन्त्र पार्टी (रास्वपा) को पहिलो ऐतिहासिक राष्ट्रिय महाधिवेशन अन्तर्गत दोस्रो चरणको निर्वाचनको मतदान समय शुक्रबार दिउँसो साढे चार बजे सम्मलाई थप गरिएको छ । पार्टीको केन्द्रीय निर्वाचन आयोगले आज एक विज्ञप्ति जारी गर्दै पूर्वनिर्धारित समय तालिकामा संशोधन गरी मतदानको अवधि बढाएको हो ।

पूर्वनिर्धारित कार्यतालिका अनुसार आज बिहान १० देखि दिउँसो २ बजेसम्म मात्रै मतदानको समय तोकिएको थियो । तर, मतदाताहरूको पहुँच तथा उपस्थितिमा देखिएको व्यावहारिक असहजतालाई मध्यनजर गर्दै आयोगले समय थप्ने निर्णय गरेको हो । सम्पूर्ण मतदाताहरूलाई सहज रूपमा मतदान गर्ने अवसर मिलोस् भन्ने उद्देश्यले मतदानको समयावधि दिउँसो ४:३० बजेसम्मका लागि थप गरिएको व्यहोरा जानकारी गराइएको छ ।

रास्वपा केन्द्रीय निर्वाचन आयोगका प्रमुख भुवन के.सीले मतदान प्रक्रियालाई थप व्यवस्थित र समावेशी बनाउनका लागि यो कदम चालिएको जानकारी दिएका छन् । निर्वाचन आयोगले सम्बन्धित सबैलाई निर्धारित नयाँ समयभित्रै मतदान प्रक्रियामा सहभागी हुन समेत आग्रह गरेको छ ।