काठमाडौं – अभिनेता अक्षय कुमार अभिनित फिल्म ‘भूत बंगला’ले बक्स अफिसमा धमाकेदार कमाइ गरिरहेको छ । फिल्मले रिलिज भएको ९ दिनमै १०० करोड क्लबमा प्रवेश गर्दै नयाँ उपलब्धि हासिल गरेको हो ।

यससँगै यो अक्षय कुमारको १०० करोड कमाउने २०औँ फिल्म बनेको छ । आइतबार बक्स अफिसमा फिल्मको स्पष्ट वर्चस्व देखिएको छ ।

रिपोर्टअनुसार ‘भूत बंगला’ ले रिलिजको १०औँ दिन १० करोड २७ लाख रुपैयाँ बराबरको व्यापार गरेको छ । दोस्रो सप्ताहन्तमा फिल्मको कमाइ सुरुआती दिनहरूको तुलनामा केही घटे पनि अन्य फिल्मको तुलनामा सन्तोषजनक देखिएको छ ।

यसअघि ८औँ दिन शुक्रबार ५ करोड ७५ लाख र ९औँ दिन १० करोड ७५ लाख कमाएको फिल्मको कुल आम्दानी १११ करोड १७ लाख पुगेको छ । अन्तिम तथ्यांक भने राति अबेरसम्म आउने बताइएको छ।

यता, ‘धुरन्धर २’ र ‘माइकल’ बीच पनि प्रतिस्पर्धा जारी छ । निर्देशक आदित्य धरको फिल्म ‘धुरन्धर २’ ले रिलिजको ३९औँ दिन आइतबार २ करोड ७५ लाख कमाएको छ । यससँगै यसको भारततर्फको कुल कमाइ १ हजार १२९ करोड ९४ लाख पुगेको छ ।

अर्कोतर्फ ‘माइकल’ ले भने कमजोर समीक्षाका बाबजुद पनि राम्रो व्यापार गरिरहेको छ। चर्चित गायक माइकल ज्याक्सनको जीवनमा आधारित यस फिल्मले रिलिजको तेस्रो दिन आइतबार ४ करोड ६० लाख कमाएको छ। फिल्मले पहिलो सप्ताहन्तमै १५ करोड १० लाख आम्दानी गरेको छ ।

यसअघि पेड प्रिभ्यूमा १ करोड ७० लाख, पहिलो दिन ३ करोड ७० लाख र दोस्रो दिन ५ करोड १० लाख कमाएको थियो । हाल बक्स अफिसमा ‘भूत बंगला’ को वर्चस्व कायम रहँदा ‘माइकल’ र ‘धुरन्धर २’ बीचको प्रतिस्पर्धा पनि रोचक बन्दै गएको छ। आगामी दिनमा दर्शकको साथ र कमाइले यी फिल्महरूको यात्रा कस्तो रहनेछ भन्ने स्पष्ट हुने देखिन्छ।