काठमाडौं– नेकपा एमालेका नेता प्रदीप ज्ञवालीले बहुचर्चित गौरीबहादुर कार्की नेतृत्वको आयोगको प्रतिवेदनमाथि गम्भीर प्रश्न उठाएका छन्।

ज्ञवालीले भदौ २३ गतेको जेन-जी आन्दोलनमा गोली प्रहारबारे विस्तृत चर्चा गरिए पनि भदौ २४ गते भएको विध्वंस र ‘राष्ट्र दहन’ सम्बन्धमा प्रतिवेदन रहस्यमय रूपमा मौन रहेको टिप्पणी गरेका छन्।

उनले भदौ २३ मा संसद भवन जोगाउन बल प्रयोग गर्ने सुरक्षाकर्मीमाथि कारबाही सिफारिस गरिएको बताउँदै भदौ २४ सिंहदरबार, सर्वोच्च अदालत र राष्ट्रपति भवन लगायत सार्वजनिक सम्पत्ति जोगाउन बल प्रयोग नगरेको भन्दै उनीहरूमाथि कारबाही सिफारिस गरिनु विरोधाभासी रहेको बताएका छन्।

ज्ञवालीले तत्कालीन राजनीतिक, प्रशासनिक र सुरक्षा नेतृत्वमाथि अनुसन्धान र अभियोजन गर्न बाँकी रहेको अवस्थामा प्रतिवेदनले कानुनका दफा नै तोकेर कारबाही सिफारिस गरेको उल्लेख गरेका छन्।

त्यस्तै पत्रकारको योग्यता, संवैधानिक नियुक्ति र मन्त्रिपरिषद् गठनजस्ता आयोगको क्षेत्राधिकारसँग सम्बन्धित नभएका विषयमा प्रतिवेदनले लामो टिप्पणी गरेको तर शान्तिपूर्ण प्रदर्शनलाई हिंसात्मक बनाउने घुसपैठियाको पहिचान गर्न नसकेको उनले बताएका छन्।

भदौ २४ मा रासायनिक पदार्थ मिसाएर बनाइएका मोलोटोभ ककटेल प्रयोग गरी सार्वजनिक तथा निजी सम्पत्ति जलाउने समूहबारे प्रतिवेदन मौन रहेको भन्दै ज्ञवालीले प्रश्न उठाएका छन्।

ज्ञवालीले प्रतिवेदनलाई ‘कलाविहीन नाटक’ को संज्ञा दिँदै पटकथा भदौ २४ मै तयार गरिएको आरोप समेत लगाएका छन्।

उनले झन्डै ३० वर्ष प्रहरी संगठनमा काम गरेका अधिकारी र कानुनका जानकारहरूले यस्तो प्रतिवेदनमा हस्ताक्षर गरेकोप्रति पनि आश्चर्य व्यक्त गरेका छन्।