काठमाडौं – आइसिसी महिला टी–२० विश्वकपको ग्लोबल छनोट अन्तर्गत समूह चरणको अन्तिम खेलमा अहिले नेपाल र स्कटल्यान्ड प्रतिस्पर्धा गर्दैछन् ।

कीर्तिपुरस्थित त्रिभुवन विश्वविद्यालयको क्रिकेट मैदानमा टस जितेर नेपालले बलिङ गर्ने निर्णय लिएपछि स्कटल्यान्डले पहिला ब्याटिङ गर्दै १४१ रनको चुनौती दिएको हो। पूरै २० ओभर खेल्दै स्कटल्यान्डले सबै विकेट गुमाएर १४० रन बनाएको हो ।

स्कटल्यान्डका लागि प्रियनाज चटर्जीले सर्वाधिक ४२ रन बनाइन् । अन्य ब्याट्सम्यानले भने उल्लेख्या रन जोड्न सकेनन् ।

स्कटल्यान्डलाई सस्तैमा समेट्न नेपालका लागि मनिषा उपाध्यायले चार विकेट हात पारिन् । चार ओभर बलिङ गर्दा १७ रन खर्चिएर उनले चार विकेट हात पारेकी हुन् । रुबिना क्षेत्रीले २३ रन खर्चिएर तीन विकेट हात पार्दा रिया शर्मा, कविता जोशी र सीता रानामगरले एकएक विकेट हात पारे ।

आज दुबै टोलीलाई सुपर सिक्समा पुग्न जित्नैपर्ने दबाब रहेको छ । स्कटल्यान्डसँग पराजित भएमा नेपालको सुपर सिक्समा पुग्ने सम्भावना समाप्त हुनेछ। नेपाल पहिलो खेलमा थाइल्यान्डसँग आठ विकेटले पराजित भएको थियो, भने दोस्रो खेलमा नेदरल्यान्ड्ससँग २ रनले पराजित भएको थियो।

यस्तै तेस्रो खेलमा भने टेष्ट राष्ट्र जिम्बाव्वेलाई ६ विकेटले पराजित गर्दै सुपर सिक्सको सम्भावना कायम राखेको हो । नेपालको प्लेइङ ११ मा कप्तान इन्दु बर्मासहित पूजा महतो, सम्झना खड्का, बिन्दु रावल, रुबिना क्षेत्री, कविता कुँवर, रिया शर्मा, मनिषा उपाध्याय, सीता राना मगर, रोमा थापा र कविता जोशी छ्न् ।