बागलुङ- निरन्तर वर्षा भइरहे पनि बागलुङको प्रसिद्ध धार्मिकस्थल बागलुङ कालिका मन्दिरमा शनिबार बिहानैदेखि भक्तजनको आवागमन रोकिएको छैन।

दर्शन तथा पूजाआजाका लागि पर्वत, म्याग्दी, कास्की, काठमाडौँलगायत विभिन्न स्थानबाट भक्तजन बागलुङ कालिका पुगेका छन्। शनिबार सामान्यतया भक्तजनको चाप बढी हुने भए पनि निरन्तरको वर्षाका कारण आज मन्दिरमा अपेक्षाकृत कम भीड रहेको छ।

बाढीपहिरोका कारण विभिन्न स्थानमा सडक अवरुद्ध हुनुका साथै प्रतिकूल मौसमका कारण भक्तजनको सङ्ख्यामा कमी आएको मन्दिर व्यवस्थापन समितिले जनाएको छ।

बागलुङ कालिकामा चैते दसैँ र बडा दसैँका अवसरमा विशेष पूजाआजा हुने गर्दछ। पछिल्लो समय अन्य दिनमा पनि दर्शन तथा पूजाआजाका लागि भक्तजन आउने गरेका छन्।

मन्दिरमा पूजाआजा गरेमा मनोकांक्षा पूरा हुने जनविश्वास रहँदै आएको छ।