काठमाडौँ – अलराउन्डर बास डि लिडेको उत्कृष्ट ९७ रनको मद्दत र धारिलो बलिङप्रेरित नेदरल्यान्ड्सले आइसिसी पुरुष क्रिकेट विश्वकप लिग-२ अन्तर्गत ११७ औँ म्याचमा नामिबियालाई ५८ रनले पराजित गरेको छ ।

घरेलु मैदान मार्सचल्करवर्टमा टस हारेर पहिले ब्याटिङको निम्तो पाएको नेदरल्यान्ड्सले निर्धारित ५० ओभरमा ६ विकेट गुमाउँदै २५१ रनको चुनौतीपूर्ण योगफल खडा गरेको थियो । नेदरल्यान्ड्सका लागि डि लिडेले ९२ बलमा ४ चौका र ३ छक्का प्रहार गर्दै सर्वाधिक ९७ रनको योगदान दिए । यस्तै, कप्तान स्कट एडवर्ड्सले ४२ तथा ओपनर म्याक्स ओ’डाउडले ३९ रन जोडे । अन्त्यतिर लोगान भ्यान बिकले १४ बलमा २५ रनको आक्रामक इनिङ्स खेलेका थिए । नामिबियाका रुबेन ट्रम्पलम्यानले ३ र जेजे स्मितले २ विकेट लिए ।

२५२ रनको विजय लक्ष्य पछ्याएको नामिबिया ४७.५ ओभरमा १९३ रनमा समेटियो । नामिबियाका लागि लौरेन स्टिनक्याम्पले ८७ बलमा ६८ रनको अर्धशतकीय इनिङ्स खेले पनि टोलीलाई जित दिलाउन सकेनन् । कप्तान गेरहार्ड एर्रास्मसले २७ र मुलान क्रुगरले ३६ रन जोडे ।

नामिबियालाई सस्तैमा रोक्न नेदरल्यान्ड्सका आर्यन दत्त र लोगान भ्यान बिकले घातक बलिङ गरे । दुवैले समान ४-४ विकेट लिएपछि नामिबियाको ब्याटिङ लाइनअप ध्वस्त भएको थियो । उत्कृष्ट अलराउन्ड प्रदर्शन गरेका बास डि लिडे ‘प्लेयर अफ द म्याच’ घोषित भए ।

नेपालसमेत सहभागी शृङ्खलामा यो नेदरल्यान्ड्सको दोस्रो जित हो । घरेलु मैदानमा भएको शृङ्खलाको पहिलो खेलमा नेदरल्यान्ड्सले नेपाललाई ६ विकेटले हराएको थियो । यो जितसँगै नेदरल्यान्ड्सले ३० खेल खेल्दा ३६ अंक जोड्दै आफूलाई तेस्रो स्थानमा बलियो बनाएको छ । समान खेल खेलेको नेपाल र नामिबिया समान २४ अंकसहित पाँचौ र छैटौं स्थानमा छन्।

लगातार दुई खेलमा पराजित भएको नेपालले तेस्रो खेल सोमबार नामिबिया र चौथो खेल बुधबार नेदरल्यान्ड्ससँग खेल्नेछ । सिधै विश्वकपमा छनोट हुन नेपालले आगामी सबै खेल जित्नुपर्ने हुन्छ । यो शृङ्खलाका दुई खेलमा पराजित भएको नेपाल दबाबमा छ ।