काठमाडौं । राष्ट्रिय स्वतन्त्र पार्टीको प्रथम महाधिवेशनमा ६ पदमा ३० भन्दा बढी आकांक्षी देखिएका छन्।

पार्टीको पहिलो महाधिवेशनमा पदाधिकारीमा हुन लागेको छ जनाको निर्वाचनमा ३० जना भन्दा बढी आकांक्षी देखिएका हुन्। रास्वपाको सभापतिमा रवि लामिछाने यसअघि नै निर्विरोध भइसकेका छन् । त्यस्तै वरिष्ठ नेतामा बालेन शाहको पनि टुंगो लागिसकेको छ ।

अन्य पदाधिकारीको भने आज निर्वाचन हुँदैछ । उपसभापतिका लागि डा स्वर्णिम वाग्ले, विराजभक्त श्रेष्ठ, गणेश पराजुली लगायतका आकांक्षा देखिन्छन्।

महिला उपसभापतिका लागि लीमा अधिकारी, तोशीमा कार्की, सोबिता गौतम, समीक्षा बास्कोटा, इन्दिरा राना मगरले उम्मेदवारी घोषणा गरेका छन् ।

महामन्त्रीका लागि अझै बढी आकांक्षी नेताहरू छन्। महामन्त्रीमा रन्जु दर्शना, शिशिर खनाल, विपिन आचार्य, कविन्द्र बुर्लाकोटी, सागर ढकाल, प्रमोद न्यौपाने लगायतका नेताहरू छन्।

सहममन्त्रीमा पनि धेरै जना नेताहरुले आकांक्षा राखेको देखिन्छ। तीनजना सहममन्त्रीका लागि निशा डाँगी, दीपक बोहरा, यज्ञमणि न्यौपाने, पुकार बम रिमा विश्वकर्मा, टीका संग्रौला, खगेन्द्र सुनुवार, प्रकाश चन्द्र परियार, असिम शाह, अंकित यादव लगायतका नेताहरूले उम्मेदवारी घोषणा गरेका छन् ।

पार्टी नेतृत्व रवि लामिछाने र वरिष्ठ नेता बालेन्द्र शाहले अहिले सर्वसम्मतिका लागि विभिन्न विकल्प गर्न खोजे पनि पदाधिकारीमा सहमतिको अवस्था देखिँदैन।
सहमतिका लागि रवि–बालेनबीच छलफ भइरहेको नेताहरूले बताएका छन् ।

रवि चितवननै छन् भने बालेन भने मंगलबार काठमाडौँ फर्किसकेका छन् । बालेन समूह फागुन २१ को निर्वाचनअघि मात्रै रास्वपामा जोडिएको हो ।