काठमाडौं- पाकिस्तानको राजधानी इस्लामावादमा अफगान पत्रकार पक्राउ परेका छन् । पाकिस्तानी प्रहरीले अफगान पत्रकार परविज अमिन्जादालाई पक्राउ गरेको हो ।

हश्त-ए सुभ दैनिकले बुधबार राति स्रोतबाट प्राप्त जानकारी अनुसार अमिन्जादालाई बुधबार बेलुका करिब पौने सात बजे फैसलावाद टाउन क्षेत्रबाट पाकिस्तानी प्रहरीले नियन्त्रणमा लिएको हो ।

अफगानिस्तानमा तालिबान पुनः सत्तामा फर्किएपछि आफ्नो सुरक्षा र सम्भावित प्रतिशोधको डरले ठूलो संख्यामा पत्रकारहरू इरान र पाकिस्तान लगायतका छिमेकी मुलुकहरूमा भागेका थिए ।

पछिल्ला महिनाहरूमा पाकिस्तानी प्रहरीले पत्रकारहरू सहित अफगान शरणार्थीहरूलाई पक्राउ गर्ने र देश निकाला गर्ने क्रम तीव्र बनाएको छ। यस कदमको पत्रकार र सञ्चार स्वतन्त्रताको पक्षमा काम गर्ने विभिन्न संघसंस्थाहरूले व्यापक विरोध जनाएका छन्।