भक्तपुर – भक्तपुरको मनोहरा नदी किनार क्षेत्रमा सुकुम्बासी बस्ती हटाउन पुगेको टोलीमाथि स्थानीयले ढुंगामुढा गर्दा स्थिति तनावग्रस्त बनेको छ।

स्थानीय प्रशासनको निर्देशनअनुसार अतिक्रमित संरचना हटाउन डोजरसहित पुगेको टोलीले गैह्रीगाउँस्थित बस्ती खाली गराएपछि साँझ मनोहरा किनारतर्फ पुगेको थियो । त्यसक्रममा स्थानीयको एक समूहले विरोध जनाउँदै डोजरमाथि ढुंगामुढा गरेको प्रहरीले जनाएको छ।

ढुंगामुढाबाट नेपाल प्रहरी का ११ जना र सशस्त्र प्रहरी बल का ८ जना गरी कुल १९ सुरक्षाकर्मी घाइते भएका छन्। घाइतेहरूको अवस्था सामान्य रहेको बताइएको छ।

स्थानीयको प्रतिकारपछि डोजरसहितको टोली तत्कालका लागि फर्किएको छ। सुरक्षा निकायले भोलि बिहानैदेखि पुनः उक्त क्षेत्र खाली गराउने तयारी भइरहेको जनाएको छ।

मनोहरा नदी किनारमा वर्षौंदेखि बसोबास गर्दै आएका सुकुम्बासी बस्ती हटाउने विषयमा यसअघि पनि विवाद हुँदै आएको थियो।