काठमाडौं- भारत सरकारले देशको उत्पादन क्षमता बढाउन एक सय वटा नयाँ औद्योगिक पार्क निर्माण गर्ने निर्णय गरेको छ । भारत सरकारको मन्त्रिपरिषद् बैठकले यस योजनाका लागि ३३६.६० अर्ब भारु खर्च गर्ने प्रस्ताव स्वीकृत गरेको हो । सूचनामन्त्री अश्विनी वैष्णवले यस कदमले घरेलु उत्पादन क्षेत्रलाई ठूलो सहयोग पुग्ने बताए ।

यी औद्योगिक पार्कहरू केन्द्र सरकार, राज्य सरकार र सरकारी कम्पनीहरूको संयुक्त लगानीमा निर्माण हुनेछन् । उद्योग सचिव अमरदीप सिंह भाटियाका अनुसार आगामी छ वर्षभित्र करिब ३३ हजार एकड जमिनमा उद्योगहरू स्थापना गरिनेछ । यस योजना अन्तर्गत एक सयदेखि एक हजार एकडसम्मका औद्योगिक क्षेत्रहरू विकास गरिनेछ ।

सरकारले पार्कको पूर्वाधार विकासका लागि प्रति एकड १० लाख भारुसम्मको आर्थिक सहायता उपलब्ध गराउनेछ । यसबाट सडक, विद्युत र अन्य सामाजिक सुविधाहरू निर्माणमा मद्दत पुग्ने अधिकारीहरूले बताएका छन्। औद्योगिक पार्कहरूले स्थानीय स्तरमा रोजगारीका अवसरहरू समेत सिर्जना गर्ने अपेक्षा गरिएको छ।