काठमाडौँ- भदौ २३ र २४ गतेको जेनजी आन्दोलनमा भ्रामक सूचना फैलाउनेहरू पनि जाँचबुझ आयोगले पहिचान गरेको छ ।

जेनजी आन्दोलनका घटना छानबिनका लागि गठन भएको जाँचबुझ आयोगले तयार पारेको प्रतिवेदनमा भ्रम फैलाउनेहरूको पहिचान गरेको हो ।

भ्रामक सूचना फैलाउनेमा गायक शिव परियार, टंक दाहाल, सुजन ढकाल, कमेडियनसमेत रहेका हमेश पन्त र भाग्य न्यौपाने रहेको आयोगको प्रतिवेदनमा उल्लेख छ ।

‘भ्रामक प्रचारहरु जस्तै २३ गतेको घटनामा चुच्चेपाटीस्थित भाटभटेनी मा ३५ शवको कंकाल भेटिएको भनी प्रचार गरी यो । त्यस्तै ३२ जना हराइरहेका प्रदर्शनकारी बानेश्वर संसद भवनभित्र मृत अवस्थामा भेटिए भनी २४ गते प्रचार गरी यो । यस्तो प्रचार गर्नमा सोसल मिडिया इन्फ्लुन्सर टंक ढकाल, सुजन ढकाल, शिव परियार, हिमेस पन्त र भाग्य न्यौपाने जस्ता व्यक्तिहरु संलग्न रहेको पाइन्छ’ प्रतिवेदनमा छ ।

अर्का एक विमान परिचारिकाले हिमालयन एयरलाइन्सबाट प्रधानमन्त्री केपी ओली भागेर दुवई पुगेको र उनले आफैँ देखेको भ्रामक प्रचार गरेको आयोगले उल्लेख गरेको छ ।

‘हिमालय एयरलाइन्सले यसको खण्डन गरी प्रेस वक्तव्य नै जारी गर्नुपर्यो । त्यस्तै एउटा अर्को मिडियामा नेपाली कांग्रेसका महामन्त्री गगन थापालाई भीडले घिसारेर पिटिरहेको प्रचार गर्यो, त्यो गलत प्रचार थियो । उपप्रधानमन्त्री तथा अर्थमन्त्री विष्णुप्रसाद पौडेल भीडबाट बच्न नदीमा भागिरहेका र व्यक्तिहरुले उनलाई पिटिरहेको दृष्य भिडियोमा देखाइएको थियो’ प्रतिवेदनमा छ ।

त्यस्तै सञ्चारकर्मी दिलभूषण पाठकले पनि भ्रामक सूचना फैलाएको आयोगको प्रतिवेदनमा उल्लेख छ ।