काठमाडौं– स्वास्थ्य बीमा बोर्डले सेवा प्रदायक स्वास्थ्य संस्थाहरूलाई दाबी भुक्तानीसम्बन्धी प्रक्रिया थप कडाइका साथ पालना गर्न निर्देशन दिएको छ । 

बोर्डले दाबी माग खर्च समिति मार्फत पुनरावलोकन गर्ने व्यवस्थालाई प्रभावकारी बनाउँदै पूर्वस्वीकृति बिना दाबी भुक्तानी नहुने स्पष्ट गरेको हो ।

स्वास्थ्य बीमा बोर्डले जारी गरेको सूचनाअनुसार स्वास्थ्य बीमा नियमावली, २०८० तथा त्यसअनुसार तय गरिएको दाबी दर्ता र मूल्याङ्कन प्रक्रियाअनुसार सेवा प्रदायक स्वास्थ्य संस्थाले दाबी पेश गर्नु अघि अनिवार्य रूपमा बोर्डको स्वीकृति लिनुपर्नेछ । यस व्यवस्थाको उद्देश्य दाबी मूल्याङ्कन प्रक्रियालाई वैज्ञानिक, पारदर्शी र प्रभावकारी बनाउने रहेको बोर्डले जनाएको छ ।

सूचनामा उल्लेख गरिएअनुसार तोकिएको मापदण्ड र प्रक्रियाअनुसार पूर्वस्वीकृति नलिई सेवा प्रदान गरी पेश गरिएका दाबीहरू भुक्तानीयोग्य हुनेछैनन् । साथै, दाबी माग खर्च समितिको निर्णयअनुसार मात्रै दाबी भुक्तानी प्रक्रिया अघि बढाइने स्पष्ट पारिएको छ ।

स्वास्थ्य बीमा बोर्डले सेवा प्रदायक स्वास्थ्य संस्थाहरूलाई प्रचलित नियम, मापदण्ड तथा प्रक्रियाको पूर्ण पालना गर्न आग्रह गर्दै, अन्यथा मापदण्ड विपरीतका दाबीहरू अस्वीकृत हुने जनाएको छ ।