काठमाडौं- भारतले जमिनबाट आकाशमा प्रहार गर्ने लामो दूरीको कुशा नामक नयाँ क्षेप्यास्त्रको पहिलो सफल परीक्षण गरेको छ ।

भारतको रक्षा अनुसन्धान तथा विकास संगठन (डीआरडीओ) ले पूर्वी राज्य ओडिसाको तटमा रहेको डा. एपीजे अब्दुल कलाम टापुबाट उक्त क्षेप्यास्त्रको परीक्षण गरेको हो ।

रक्षामन्त्री राजनाथ सिंहले सामाजिक सञ्जाल एक्समार्फत कुशा क्षेप्यास्त्र प्रणालीले लडाकु विमान, क्षेप्यास्त्र, मानवरहित हवाइ साधन (यूएभी) र ठूला विमानलगायत धेरै किसिमका हवाई खतरालाई फराकिलो दायरा र उचाइभित्रै निष्प्रभावी बनाउन सक्षम रहेको जानकारी दिएका छन् ।

उनले आजको सफल परीक्षण उडानले भारतीय रक्षा अनुसन्धान तथा विकासको क्षेत्रमा एक महत्त्वपूर्ण माइलस्टोन हासिल भएको बताएका छन्। लामो दूरीको सतहबाट आकाशमा मार हान्ने क्षेप्यास्त्र प्रणाली विकास गर्ने क्षमता विश्वका थोरै मात्र राष्ट्रहरूसँग रहेको उनको भनाइ छ।

रक्षा मन्त्री सिंहले यो परीक्षणले यस्ता प्रणालीका लागि आयातमा रहेको परनिर्भरता समेत अन्त्य गर्ने र देशको हवाई रक्षा क्षमतामा ठूलो फड्को मार्ने बताएका छन्।