काठमाडौँ – फिफा विश्वकप २०२६ अन्तर्गत डालस रङ्गशालामा अर्जेन्टिना र अस्ट्रियाबीचको खेल हेर्न पुगेकी चर्चित कोलम्बियन गायिका शाकिरासँग जोडिएको एउटा भिडियो क्लिपले सामाजिक सञ्जालमा ठूलै खैलाबैला मच्चायो ।

टेलिभिजन लाइभ प्रसारणका क्रममा एक व्यक्तिले ४९ वर्षीया गायिकालाई जबरजस्ती किस खाएको (चुम्बन गरेको) र उनी असहज देखिएको भन्दै फ्यानले चिन्ता व्यक्त गरे पनि पछि त्यो घटना केवल एउटा सुन्दर पारिवारिक क्षण मात्र रहेको खुलेको छ ।

सोमबार डालस स्टेडियमको भीआईपी सुइटबाट शाकिराले लियोनेल मेस्सीको कप्तानीमा रहेको अर्जेन्टिनाले अस्ट्रियालाई २–० ले हराएको खेल हेरिरहेकी थिइन् । र्‍यापर बर्न ब्वासँग मिलेर विश्वकप २०२६ को आधिकारिक एन्थम गाएकी ‘हिप्स डन्ट लाई’ स्टार शाकिरालाई जब मैदानको ठूलो स्क्रिनमा देखाइयो, दर्शकले उनको भव्य स्वागत गरेका थिए ।

तर, घरमै बसेर खेल हेरिरहेका फ्यान भने लाइभ प्रसारणको एउटा दृश्य देखेपछि झस्किए । शाकिराको देब्रेतर्फ बसेका एक व्यक्तिले उनीमाथि झुकेर काँधमा हात राख्दै गालामा चुम्बन गरेका थिए । सो क्रममा शाकिरा केही पछि सरेको र असहज देखिएको दाबी गर्दै सामाजिक सञ्जाल ‘एक्स’मा फ्यानले “के शाकिरा ठिक छिन् ?” भन्दै प्रश्न उठाउन थालेका थिए । कतिपयले त ती व्यक्तिले शाकिरामाथि जबरजस्ती गर्न खोजेको भन्दै आक्रोशसमेत पोखे ।

तर, वास्तविकता बाहिर आएपछि फ्यानको त्यो चिन्ता राहतमा बदलियो । शाकिरालाई गालामा किस खाने अरू कोही नभएर उनकै १३ वर्षीय जेठा छोरा मिलान थिए । शाकिरा आफ्ना दुई छोरा- १३ वर्षीय मिलान र ११ वर्षीय सासाका साथ खेल हेर्न पुगेकी थिइन् । दुवै छोरा शाकिरा र उनका पूर्वसम्बन्धित पार्टनर एवं स्पेनी फुटबलर जेरार्ड पिकेका हुन् ।

खेलका क्रममा कालो टिसर्ट र सेतो क्याप लगाएका मिलानको अनुहार टोपीका कारण स्पष्ट नदेखिएकाले फ्यानमाझ भ्रम पैदा भएको थियो । मिलानले झुकेर आमालाई माया गर्दा झुक्किएर शाकिराको कपालमा अलिकति तानिन पुगेको र त्यसैले गर्दा शाकिराको अनुहारमा क्षणिक असहजता देखिएको बुझिएको छ । यो तथ्य खुलेपछि सामाजिक सञ्जालमा भइरहेको गलत हल्ला र फ्यानको चिन्ता शान्त भएको छ ।