काठमाडौँ– नेकपा एमालेले पार्टी उपाध्यक्ष विष्णुप्रसाद पौडेलको गिरफ्तारी घोर प्रतिशोधपूर्ण, पूर्वाग्रहप्रेरित र गैरकानुनी रहेको ठहर गरेको छ ।

मंगलबार साँझ बसेको सचिवालयको नवौँ बैठकले राजनीतिक पूर्वाग्रहबाट अभिप्रेरित भएर गरिएको गिरफ्तारीको दृढतापूर्वक प्रतिवाद गर्दै बिनासर्त अविलम्ब रिहा गर्न माग गरेको छ ।

राज्य संयन्त्रको निरङ्कुश, प्रतिशोधपूर्ण र विभेदकारी कदमका विरुद्ध देशव्यापी रूपमा राजनीतिक प्रतिरोध र भण्डाफोर अभियान सञ्चालन गर्न बैठकले सम्पूर्ण पार्टीपङ्क्तिलाई आह्वान समेत गरेको छ ।

उपाध्यक्ष पौडेललाई सम्पत्ति शुद्धीकरणको अभियोगमा प्रहरीले गत सोमबार सुर्खेतबाट पक्राउ गरेको थियो । उपाध्यक्ष पौडेलमाथि अनुसन्धानका लागि विशेष अदालतले सातदिन हिरासतमा राख्न अनुमतिसमेत दिइसकेको छ ।

एमाले सचिवालय बैठकका निर्णयहरु :
१) गैरकानुनी गिरफ्तारीको निन्दा : बिनाकुनै वस्तुपरक तथ्य र प्रमाण, केवल राजनीतिक प्रतिशोध साध्ने कुत्सित मनसायका साथ सम्पत्ति शुद्धीकरणको बहानामा गरिएको गैरकानुनी गिरफ्तारीको पार्टीले राजनीतिक र कानुनी दुवै रूपमा सशक्त प्रतिवाद गर्ने ।

२) अदालती आदेशप्रति असहमति : राजनीतिक पूर्वाग्रहबाट अभिप्रेरित यस घटनामा विशेष अदालतले पूर्वापक्षका लागि थुनामा राख्न दिएको आदेशसमेत न्यायसम्मत नरहेको ठहर गर्दछ ।

३) विनासर्त रिहाइको माग : बैठकले पार्टीका उपाध्यक्ष कमरेड विष्णुप्रसाद पौडेललाई बिनासर्त अविलम्ब रिहा गर्न जोडदार माग गर्दछ ।

४) भण्डाफोर अभियान : राज्य संयन्त्रको यस प्रकारको निरङ्कुश, प्रतिशोधपूर्ण र विभेदकारी कदमका विरुद्ध देशव्यापी रूपमा राजनीतिक प्रतिरोध र भण्डाफोर अभियान सञ्चालन गर्न बैठकले सम्पूर्ण पार्टीपङ्क्ति एवं न्यायप्रेमी जनसमुदायलाई हार्दिक आह्वान गर्दछ।