काठमाडौं – करिब १० घन्टा लामो नेकपा एमाले सचिवालय बैठक सम्पन्न भएको छ । पार्टी अध्यक्ष केपी शर्मा ओली को निवास गुण्डुमा मध्यान्ह १२ बजेदेखि बसेको बैठक राति अबेरसम्म चलेको हो ।

बैठकमा नेताहरूको कार्यविभाजन, विभिन्न कार्यदल गठन तथा संगठनात्मक विषयमा विस्तृत छलफल गरिएको उपमहासचिव लेखराज भट्ट ले जानकारी दिएका छन् ।

उनका अनुसार, पार्टीको नयाँ भवन मदरनगर बल्खुमा बनाउने निर्णय पनि बैठकमा गरिएको छ । यसअघि भवन बनाउनका लागि व्यवसायी मिनबहादुर गुरुङले दिएको जग्गादान फिर्ता गर्ने निर्णय भएको छ ।

यस्तै बैठकमा सहभागी नेताहरूले पार्टी पुनर्गठनको पक्षमा धारणा राखेका थिए। अधिकांश नेताहरूको सुझावपछि नेतृत्व र कार्यशैलीबारे पनि गम्भीर बहस भएको स्रोतहरूले जनाएका छन्।

बैठकमा उठेका विषयहरूबारे अध्यक्ष ओलीले अन्त्यमा जवाफ दिएका थिए। संगठनलाई थप सुदृढ बनाउने, जिम्मेवारी बाँडफाँड गर्ने र आगामी रणनीति तय गर्ने विषयमा बैठक केन्द्रित रहेको बताइएको छ।