काठमाडौं- प्रतिनिधि सभामा रहेका विपक्षी दलहरूले सरकारविरुद्ध थप आक्रामक रूपमा प्रस्तुत हुने तयारी गरेका छन्।

काठमाडौं- प्रतिनिधिसभाका विपक्षी दलहरूले प्रधानमन्त्री वालेन्द्र शाह संसद्प्रति जवाफदेही हुनैपर्ने निष्कर्ष निकालेका छन् ।

सिंहदरबारस्थित नेकपा एमाले संसदीय दलको कार्यालयमा बसेको विपक्षी दलका प्रमुख सचेतकहरूको बैठकले प्रतिनिधि सभामा विरोधलाई निरन्तरता दिने निर्णय गरेको हो ।

यही मंगलबार बस्ने भनिएको प्रतिनिधि सभाको बैठकमा सरकारको कार्यशैली र प्रधानमन्त्रीले संसद्लाई गरेको बेवास्ताको सशक्त विरोधमा उत्रिने निर्णय प्रतिपक्षी दलहरूले निकालेका हुन् ।

उक्त बैठकपछि एमालेका प्रमुख सचेतक महरले वालेन्द्र सरकारको कार्यशैली, संसद्प्रतिको उपेक्षापूर्ण व्यवहार र सभामुख डोलप्रसाद अर्यालको भूमिकालाई लिएर गम्भीर छलफल भएको बताएका छन् ।

महरले संसदीय मूल्य र मान्यताविपरीत विपक्षीको आवाज दबाउने, पेलेर अघि बढ्ने सरकार र सभामुखको शैली, गैर-लोकतान्त्रिक प्रवृत्तिबारे छलफल भएको बताए । सभामुख अर्याल अझै राष्ट्रिय स्वतन्त्र पार्टीको नेता जस्तो रुपमा देखिएको निष्कर्षसहित विपक्षी दलहरूले त्यसमा गम्भीर चिन्ता जाहेर गरेका छन्।

छलफलपछि नेकपाका प्रमुख सचेतक युवराज दुलालले प्रधानमन्त्री बालेनले संसद्लाई बेवास्ता र उपेक्षा गरेको, विपक्षी दलको विरोधलाई नजरअन्दाज गरेर नटेरेको कुरामा पनि गम्भीर छलपल भएको बताएका छन् ।

विपक्षी दलहरूले संविधान कार्यान्वयन, प्रतिनिधि सभा नियमावलीको पालना र लोकतन्त्रको रक्षाका लागि आगामी दिनमा सहकार्य र समन्वयलाई निरन्तरता दिने सहमति जुटाएका छन् ।

प्रधानमन्त्री शाहले संसद्‍मा आएर सांसदहरूका प्रश्नको जवाफ दिनुपर्ने बताइरहेका छन् । यसअघि एक्लाएक्लै आन्दोलित दलहरूले अब साझा र सामूहिक रुपमा विरोधलाई चर्काउने भएका हुन्।

यो छलफलमा नेपाली कांग्रेसकी प्रमुख सचेतक बासना थापा, एमालेका प्रमुख सचेतक ऐनबहादुर महर, नेकपाका प्रमुख सचेतक युवराज दुलाल र राष्ट्रिय प्रजातन्त्र पार्टीकी प्रमुख सचेतक खुश्बु ओली सहभागी थिए।

तर बैठकमा श्रमसंस्कृतिका कोही पनि प्रतिनिधि सहभागी भएनन्। बालेन र उनी नेतृत्वको सरकारको सबैभन्दा कठोर र चर्को आलोचना श्रमसंस्कृतिले नै गर्दै आएको छ।