काठमाडौँ । सरकारले काठमाडौँ महानगरसँगको समन्वयमा काठमाडौँका विभिन्न सुकुमवासी बस्ती भत्काउँदैछ । आज साँझसम्म खाली गर्न चेतावनी दिएपछि अतिक्रमण गरेर बस्दै आएका केही सुकुमवासीहरु आफैँ घर टहरा भत्काउँदै खाली गरिरहेका छन् ।

केहीले भने अटेर गर्दै बसिरहेका छन् । भोलि बिहान ७ बजेदेखि थापाथलीस्थित सुकुमवासी बस्तीमा सबैभन्दा पहिले डोजर चल्ने काठमाडौँ महानगर प्रहरी स्रोतले जनाएको छ । स्रोतका अनुसार थापाथली सुकुमवासी बस्ती भएको ठाउँमा चलाउनका लागि ५ वटा डोजर तयारी अवस्थामा राखिएको छ ।

बस्ती भत्काउँदा हुनसक्ने सम्भावित घटनाबारे काठमाडौँ प्रशासन र काठमाडौँ महानगरले समन्वय गरेको बताइएको छ । सरकारले पहिलो चरणमा थापाथली, मनोहरा, सिनामंगल–गैरिगाउँ क्षेत्रमा डोजर लगाउँदैछ ।