काठमाडौं- शुक्रबार बिहानैदेखि थापाथलीस्थित बागमती किनारमा अवस्थित सुकुम्वासी बस्ती असामान्य रूपमा व्यस्त देखिन्छ।

गल्लीहरूमा बाकस, ओछ्यान, भाँडाकुँडा र लत्ताकपडाका थुप्रा छन् । केही गाडीहरू सामान बोकेर बाहिरिँदै छन् । कतिपय अझै पनि आफ्नो थोरै सम्पत्ति मिलाउँदै र जोगाउँदै छन्।

सरकारले नदी किनारका सुकुम्वासी बस्ती खाली गर्ने निर्णय गरेसँगै यहाँका बासिन्दाले आफ्नो सामान सार्न थालेका हुन्। तर, सामान सार्ने हतारसँगै अनिश्चितता र डर पनि उत्तिकै देखिन्छ ।

‘हामीलाई कहाँ राख्ने भन्ने कोही आएर भनेको छैन। हिजो माइकमै ‘सामान सुरक्षित राख्नु’ भनेर मात्रै भने। त्यसैले हामी सामान जोगाइरहेका छौं, तर बस्ने ठाउँ त कतै छैन’, एक महिला ले भनिन् ।

बस्तीका केही भागमा विरोध प्रदर्शन पनि जारी छ। प्लेकार्ड बोकेका सुकुम्वासीहरूले सत्तारूढ दलको बाचा सम्झाउँदै व्यवस्थापनको माग गरिरहेका छन्।

उनीहरूको मुख्य चिन्ता एउटै छ, स्थानान्तरण भए पनि रोजगारी र दैनिक जीवन प्रभावित नहोस्।

‘हामी काम गरेर पेट पाल्ने मान्छे हौँ,’ अर्का एक बासिन्दा भन्छन्, ‘जहाँ राखे पनि काम गर्न सजिलो हुने ठाउँ हुनुपर्छ। बालबच्चा पढाउनुपर्छ, गाडी चढ्न मिल्ने ठाउँ चाहिन्छ।’

केही दिनअघि प्रहरी टोली आएर निरीक्षण गरेर गएकोबाहेक महानगरपालिकाबाट कुनै समन्वय नभएको उनीहरूले बताएका छन् ।

‘हामी यहाँ रहरले होइन, बाध्यताले बसेका हौं,’ एक वृद्धले भने, ‘अब सरकारले व्यवस्थापन गर्छु भनेको छ, तर कहिले र कसरी त्यो थाहा छैन।’

अहिलेलाई आन्दोलित धेरैजसो परिवारले रातमा पनि यहीँ बस्ने निर्णय गरेका छन्। उनीहरू रास्वपा र बालेन शाह नेतृत्वको सरकारविरुद्ध नाराबाजी गरिरहेका छन् ।

शब्द/तस्बिर : नेपाल फोटो लाइब्रेरी