काठमाडौं – केही दिनअघि मात्रै प्रदर्शनमा ५१ दिन मनाएको फिल्म ‘आबाट आमा’को सिक्वेल ‘आबाट आमा २’ सिक्वेलको सुटिङ वैशाख २ गतेबाट सुरु हुने भएको छ ।

सिक्वेलका लागि अघिल्लो भागका शीर्ष कलाकार नायक पल शाह र उनको आमाको भूमिकामा रहेकी नायिका विपना थापा दोहोरिने भएका छन् ।

यी दुई कलाकार र निर्माण पक्षबीच कागजी सम्झौता भइसकेको निर्देशक चन्द्र पन्तले जनाएका छन् ।

पहिलो भागको कथालाई निरन्तरता दिनका लागि यी कलाकारहरू दोहोरिएको उनले बताए ।

फिल्मका शीर्ष दुई नायिका सिम्रन पन्त र उषा उप्रेती भने अनुबन्ध भइसकेका छैनन् । यसबारे निर्देशक पन्त भन्छन्, ‘पहिला दुई कलाकार मात्रै अनुबन्ध गरेका छौं । बाँकी कलाकारबारे केही समयपछि जानकारी दिनेछौं ।’

आगामी दशैँमा यो फिल्म प्रदर्शनमा ल्याउने निर्देशक पन्तको तयारी रहेको छ ।