काठमाडौं -बंगलादेश क्रिकेट बोर्ड (बीसीबी) ले भारतमा आयोजना हुने टी–२० विश्वकपमा सहभागी नहुने निर्णय गरेसँगै बंगलादेशी क्रिकेटलाई ठूलो आर्थिक क्षति हुने देखिएको छ।

बीसीबीले अन्तर्राष्ट्रिय क्रिकेट परिषद (आईसीसी) र देशको अन्तरिम सरकारसँग पटक–पटक छलफल गरेपछि प्रतियोगितामा नजाने निर्णय गरेको हो। यद्यपि बोर्डले अझै प्रयास जारी रहेको जनाएको छ। तर विश्वकप सुरु हुन अब दुई हप्ता मात्र बाँकी रहेकाले सहभागिताको सम्भावना कमजोर बन्दै गएको छ।

आईसीसीले प्रतियोगिताको तय कार्यक्रम परिवर्तन गर्न नसकिने स्पष्ट संकेत दिएको छ। आईसीसीद्वारा आयोजना गरिने यस्ता ठूला प्रतियोगिताहरू क्रिकेट बोर्ड र खेलाडीका लागि आम्दानीको मुख्य स्रोत मानिन्छन्।

टी–२० विश्वकपमा सहभागी नहुँदा बीसीबी मात्र होइन, बंगलादेशका क्रिकेटर, प्रायोजक तथा क्रिकेटसँग प्रत्यक्ष र अप्रत्यक्ष रूपमा जोडिएका व्यक्तिहरूलाई पनि आर्थिक घाटा हुने अनुमान गरिएको छ।