काठमाडौं– बलिउडका ‘किङ’ शाहरुख खानको अनुमानित सम्पत्तिमा ठूलो गिरावट आएको छ । एक वर्षको अवधिमा उनको अनुमानित सम्पत्ति २ हजार ४९० करोड भारूले घटे पनि उनी भारतकै सबैभन्दा धनी अभिनेता बनेका छन् ।

‘हुरून इन्डिया रिच लिस्ट २०२६’ अनुसार शाहरुख खानको अनुमानित सम्पत्ति अहिले १० हजार करोड भारू रहेको छ । गत वर्ष उनको सम्पत्ति १२ हजार ४९० करोड भारू अनुमान गरिएको थियो । त्यसबेला उनी पहिलोपटक अर्बपतिको सूचीमा समेत परेका थिए ।

सम्पत्ति घटे पनि शाहरुख लगातार दोस्रो वर्ष भारतका धनी अभिनेता बनेका हुन् । उनको सम्पत्तिमा फिल्मबाट हुने आम्दानी मात्र नभई निर्माण कम्पनी रेड चिलिज इन्टरटेनमेन्ट र आईपीएल टोली कोलकाता नाइट राइडर्ससँग जोडिएका व्यावसायिक लगानी पनि समावेश छन् ।

हुरूनको यस्तो सम्पत्ति अनुमान निजी कम्पनी, लगानी र अन्य सम्पत्तिको मूल्यांकनमा आधारित हुने भएकाले यसको अंक वर्षअनुसार परिवर्तन हुन सक्ने बताइएको छ । त्यसैले सूचीमा देखिएको गिरावटलाई शाहरुखको प्रत्यक्ष आम्दानी घटेको अर्थमा मात्र बुझ्न नहुने देखिन्छ ।

यस वर्षको सूचीमा अमिताभ बच्चन ४ हजार करोड भारू अनुमानित सम्पत्तिसहित दोस्रो स्थानमा छन्। त्यसपछि सलमान खानको ३ हजार करोड र ऋतिक रोशनको २ हजार ५ सय करोड भारू अनुमानित सम्पत्ति रहेको छ।

गत वर्ष ७ हजार ७९० करोड भारू सम्पत्तिसहित सूचीमा रहेकी जुही चावला यसपटक भने समावेश छैनन्। त्यस्तै, करण जोहरको नाम पनि यस वर्षको सूचीमा छैन ।

सम्पत्तिको चर्चासँगै शाहरुख अहिले आफ्नो आगामी फिल्म ‘किङ’ का कारण पनि चर्चामा छन् । सिद्धार्थ आनन्दको निर्देशनमा बन्ने फिल्ममा शाहरुखसँगै सुहाना खान, दीपिका पादुकोण, रानी मुखर्जी र अभिषेक बच्चनलगायत कलाकारको अभिनय छ । फिल्म डिसेम्बर २४ (पुस ९) मा प्रदर्शनमा आउने तयारीमा छ ।