सुनसरी – पूर्व–पश्चिम राजमार्गअन्तर्गत सुनसरीको कोशी गाउँपालिका–४ मा बिहीबार बिहान यात्रुवाहक माइक्रोबस दुर्घटना हुँदा चालकसहित १२ जना घाइते भएका छन्।

पश्चिमबाट पूर्वतर्फ जाँदै गरेको प्रदेश २–००१ ज १५६ नम्बरको माइक्रोबस बिहीबार बिहान साढे ७ बजेतिर अनियन्त्रित भई सडकमा पल्टिएको हो।

दुर्घटनामा परेर घाइते हुनेहरूमा सप्तरी कञ्चनपुर नगरपालिका–११ का ३२ वर्षीय चालक आर्यन पोखरेल, सोही ठाउँका ७० वर्षीय दनसलाल चौधरी, ६० वर्षीय असरफि खङ, ३० वर्षीया सुनिता खङ र २१ वर्षीया माया भुजेल रहेका छन्।

यस्तै, कञ्चनपुर नगरपालिका–१ का ४३ वर्षीय गोबिन्द गुप्ता र ४७ वर्षीया राधा नेपाल, वडा नम्बर ६ का ४० वर्षीय देवाकान्त चौधरी र ३० वर्षीया पुजा चौधरी, वडा नम्बर १२ का ५१ वर्षीय बलराम पौडेल तथा सप्तरीकै फत्तेपुर–१ का ३६ वर्षीया उर्मिला भुजेल र २१ वर्षीया उशा भुजेल घाइते भएका छन्।

घाइते सबैको सप्तकोशी न्युरो अस्पतालमा उपचार भइरहेको छ। घाइतेमध्ये ५१ वर्षीय बलराम पौडेलको प्राथमिक उपचारपछि बिहान साढे ९ बजे डिस्चार्ज भइसकेको प्रहरीले जनाएको छ। दुर्घटनाको कारणबारे थप अनुसन्धान भइरहेको छ।