पोखरा– स्थानीयवासीको पटकपटकको दबाब र विरोधपछि पोखराको हरिचोक–याम्दी सडकखण्ड अन्ततः चार लेनमा विस्तार गरिएको छ। करिब चार वर्ष लगाएर सम्पन्न भएको २.२ किलोमिटर सडकखण्ड फराकिलो पारेर कालोपत्रे, लाइन मार्किङ तथा आवश्यक पूर्वाधार निर्माण गरिएपछि अहिले सञ्चालनमा आएको छ।

यो सडक भूपी शेरचन राजमार्ग र मध्यपहाडी लोकमार्गअन्तर्गत पर्ने महत्वपूर्ण खण्ड हो। निर्माण कार्य लामो समयसम्म सम्पन्न हुन नसक्दा पोखराका स्थानीयसँगै पर्वत, बागलुङ, म्याग्दी र मुस्ताङ आवतजावत गर्ने यात्रुले सास्ती भोग्नुपरेको थियो।

निर्माणमा भएको ढिलाइप्रति असन्तुष्टि जनाउँदै स्थानीयले २०८१ असार १५ गते राष्ट्रिय धान दिवसका अवसरमा सडकमै धान रोपेर विरोध प्रदर्शनसमेत गरेका थिए।

मोतिदान कन्स्ट्रक्सन सेवा प्रा.लि.ले २०७९ साउन १४ गते ४८ करोड रुपैयाँमा सडक स्तरोन्नतिको ठेक्का पाएको थियो। दुई वर्षभित्र काम सम्पन्न गर्ने सम्झौता भए पनि निर्माण कार्य समयमै पूरा हुन नसकेपछि तीनपटक म्याद थप गरिएको थियो।

सुरुमा २०८१ साउनसम्म सम्पन्न गर्ने लक्ष्य रहे पनि काम अधुरै रहेपछि सोही वर्ष चैत मसान्तसम्म म्याद थपिएको थियो। त्यसपछि अन्तिमपटक २०८३ वैशाख मसान्तसम्मको समयसीमा दिइए पनि ठेकेदार कम्पनीले निर्धारित अन्तिम म्यादअघि नै निर्माण कार्य सम्पन्न गरेको हो।

सडक विस्तार सम्पन्न भएसँगै यस क्षेत्रमा यातायात सहज हुने, दुर्घटनाको जोखिम घट्ने तथा पोखरा हुँदै पश्चिमका जिल्लासँगको आवागमन थप सुरक्षित र प्रभावकारी हुने अपेक्षा गरिएको छ।